नाइमामार्फत ५० लाख जम्मा

नेपाल अटोमोबाइल इम्पोर्टर्स एन्ड म्यानुफ्याक्चरर्स एसोसिएसन (नाइमा)ले रसुवा बाढीबाट प्रभावित नागरिकको राहत तथा पुनस्र्थापनामा सघाउन प्रधानमन्त्री दैवीप्रकोप उद्धार कोषमा ५० लाख सहयोग गर्ने निर्णय गरेको छ । 

नाइमाले १० भदौको भोटेकोशी बाढीबाट भएको मानवीय तथा भौतिक क्षतिप्रति दुःख व्यक्त गर्दै ज्यान गुमाउनेप्रति श्रद्धाञ्जली तथा घाइतेहरूको शीघ्र स्वास्थ्यलाभको कामना गरेको छ । साथै, विपत्तिको समयमा सदस्य संस्थाले गरेको सहयोगको पनि नाइमाले प्रशंसा गरेको छ ।

नाइमाले आफ्नो स्थापनाकालदेखि नै विपत् तथा आपत्कालीन अवस्थामा सरकार तथा प्रभावित समुदायलाई सहयोग गर्दै आएको अध्यक्ष ऋतु सिंह वैद्यले बताइन् । ‘कठिन समयमा सरकार र प्रभावित नागरिकलाई सहयोग गर्नु निजी क्षेत्रको पनि साझा दायित्व हो,’ उनले भनिन्, ‘सरकार, निजी क्षेत्र र समुदायबिचको सहकार्यले नै राहत तथा पुनस्र्थापनालाई प्रभावकारी बनाउन सक्छ ।’

नाइमाले अटोमोबाइल तथा मोबिलिटी क्षेत्रका सम्पूर्ण सरोकारवालालाई आफ्नो क्षमता र उपलब्ध स्रोतअनुसार प्रभावित नागरिकको सहयोगमा हातेमालो गर्नसमेत आग्रह गरेको छ ।