दुईपटकको साबिक उपविजेता सुदूरपश्चिम रोयल्सले तेस्रो संस्करणको नेपाल प्रिमियर लिग (एनपिएल), २०२६ का लागि इंग्ल्यान्डका अलराउन्डर सेफ अली जैबलाई पहिलो विदेशी खेलाडीका रूपमा भिœयाएको छ । जैब पहिलो संस्करणमा सर्वोत्कृष्ट खेलाडी घोषित भएका थिए । दोस्रो संस्करणमा उनले चितवन राइनोजबाट प्रतिस्पर्धा गरेका थिए । सुदूरपश्चिमबाट पुनः एनपिएल खेल्ने अवसर पाउँदा आफू घर फर्किएको उनले बताएका छन् ।
सुदूरपश्चिमका प्रमुख कार्यकारी अधिकृत प्रकाश खड्काले जैबबाट यसपटक पनि पहिलो संस्करणमा जस्तै उत्कृष्ट योगदानको अपेक्षा राखेको जनाए । एनपिएलको पहिलो संस्करणमा जैबले सर्वोत्कृष्ट खेलाडी उपाधि जित्दा नौ खेलमा दुई अर्धशतकसहित २७५ रन बनाएका थिए । उनले बलिङमा १२ विकेट लिएका थिए । गत वर्ष मंसिरमा भएको दोस्रो संस्करणमा उनी चितवनमा आबद्ध भए । उनले ७ खेलमा ११६ रन बनाउनु साथै पाँच विकेट पनि लिए ।
टी–२० फ्रेन्चाइजमा उत्कृष्ट अलराउन्डरका रूपमा रहेका जैबले इंग्ल्यान्डको राष्ट्रिय टोलीबाट खेल्ने अवसर पाएका छैनन् । तर, उनी इंग्ल्यान्डको घरेलु क्रिकेटमा सक्रिय छन् । बायाँहाते ब्याट्सम्यान जैबले ११२ टी–२० क्रिकेटमा १४० भन्दा बढीको स्ट्राइक रेटमा ब्याटिङ गरेका छन् । उनले अहिलेसम्म एक हजार ७९२ बटुलेका छन् । बायाँहाते स्लो स्पिनर जैबले टी–२० क्रिकेटमा २३ विकेट पनि लिएका छन् । उनले पछिल्लो समय भाइटालिटी ब्लास्ट र द हन्ड्रेडमा खेलेका थिए ।
सुदूरपश्चिममा फर्किंदा जैब दंग
सुदूरपश्चिममा फर्किएपछि जैबले आफू निकै हर्षित भएको बताएका छन् । ‘म फेरि आफ्नो घरमा फर्कन पाउँदा निकै खुसी छु,’ सोसल मिडियामा उनले भनेका छन्, ‘नेपालमा फेरि आएर खेल्न उत्साहित छु ।’ यसैगरी सुदूरपश्चिमका सिइओ खड्काले जैब एनपिएलमा परिपक्व हुँदै गएको बताए । ‘जैबलाई फेरि टोलीमा स्वागत गर्न पाउँदा खुसी र उत्साहित छौँ । यसपटक पनि उनीबाट पहिलो संस्करणमा जस्तै योगदानको अपेक्षा राखेका छौँ,’ खड्काले भने ।
सुदूरपश्चिमले तेस्रो एनपिएलका लागि कप्तान दीपेन्द्रसिंह ऐरीसहित विनोद भण्डारी, आरिफ शेख, ईशान पाण्डे, अभिनाश बोहरा, हेमन्त धामी र हिक्मत महरालाई रिटेन गरेको थियो । यस्तै, अक्सनमार्फत दीपक बोहरा, मिलन बोहरा, टेक रावत, अनिल खरेल, सचिन भट्ट र आयुव चन्दलाई टोलीमा भित्र्याएको छ ।
