गत फागुनमा उपचारका लागि विदेश गएका थिए देउवा
कांग्रेस निवर्तमान सभापति शेरबहादुर देउवा पूर्वनिर्धातिर कार्यतालिकाभन्दा दुई दिन ढिला गरी २८ साउनमा स्वदेश फर्कने भएका छन् । यसअघि २६ साउनमा स्वदेश फर्कने भनिए पनि समय परिवर्तन गरिएको उनीनिकटस्थ नेताहरूले बताएका छन् । हाल उनी हङकङमा छन् ।
नेता–कार्यकर्ताको मागअनुसार देउवाको स्वदेश फर्कने समय परिवर्तन गरिएको कांग्रेस नेता प्रकाशशरण महतले बताए । उनका अनुसार देउवा २६ साउनको राति फर्कने तयारीमा थिए । तर, दिउँसो नै उनलाई स्वागत गर्न पाउनुपर्ने नेता–कार्यकर्ताको आग्रह आएपछि उडान समय परिवर्तन गरिएको छ ।
‘२६ गते राति हुने भयो । दिउँसो नै उहाँलाई स्वागत गर्न पाउनुपर्छ भन्ने नेता तथा कार्यकर्ताको मागअनुसार नै उहाँको स्वदेश फर्कने समय परिवर्तन भएको हो,’ महतले भने, ‘अब उहाँ २८ गते दिउँसो १२:२५ बजे काठमाडौं उत्रनुहुनेछ ।’
देउवा फर्किने भएपछि कांग्रेसले उनको स्वागतका लागि कार्यक्रमसमेत तय गरेको छ । ‘उहाँको स्वागतका लागि हामी विमानस्थल पुग्छौँ । नेता–कार्यकर्ताले उहाँलाई विमानस्थलमै भव्य स्वागत गर्ने कार्यक्रम छ,’ महतले भने ।
देउवा पक्षले सामाजिक सञ्जालमार्फत ‘श्रद्धेय नेता शेरबहादुर देउवालाई स्वागत गरौँ’ भन्ने ब्यानरसहित स्वागतको प्रचारप्रसारसमेत थालेको छ । नेता तथा कार्यकर्तालाई २८ साउनको बिहान साढे ११ बजे विमानस्थलमा उपस्थित हुन आह्वान गरिएको छ ।
स्वदेश फर्किएको भोलिपल्टै देउवा आफूनिकट राष्ट्रिय कार्यकर्ता भेलामा सहभागी हुनेछन् । भेलालाई देउवाले सम्बोधन गर्ने भेला आयोजक समितिका संयोजक डा. शशांक कोइरालाले बताइसकेका छन् । उपचारका लागि देउवा गत फागुनमा विदेश गएका थिए । ६ महिनापछि उनी स्वदेश फर्किन लागेका हुन् ।
सर्वोच्च अदालतले कांग्रेस नेतृत्वको आधिकारिकता विवादमा पुनरवलोकनको अनुमति दिएको भोलिपल्ट संस्थापन र इतर दुवै पक्षले पूर्वनिर्धारित आ–आफ्ना कार्यक्रम नरोक्ने घोषणा गरेका छन् । संस्थापन पक्ष (गगन थापा)ले विशेष महाधिवेशनबाट निर्वाचित नेतृत्वको वैधानिकताको कानुनी प्रतिरक्षा गर्दै तोकिएको समयभित्र महाधिवेशन सम्पन्न गर्ने जनाएको छ भने इतर पक्ष (शेरबहादुर देउवा)ले २९ देखि ३१ साउनसम्म हुने राष्ट्रिय भेला नरोक्ने बताएको छ ।
