नेपाली युवालाई प्राविधिक तथा व्यावसायिक सिप प्रदान गरी आत्मनिर्भर बनाउने उद्देश्यले सञ्चालित ‘एलजी सिपशिक्षा’ कार्यक्रमको १६औँ ब्याच काठमाडौंमा सुरु भएको छ ।
चौधरी फाउन्डेसन र एलजी इलेक्ट्रोनिक्सको संयुक्त पहलमा उक्त कार्यक्रम सञ्चालन भएको हो । कार्यक्रमको उद्देश्य युवालाई बजारको मागअनुसारका व्यावसायिक तथा प्राविधिक सिप प्रदान गरी समाजमा योगदान पुर्याउनु रहेको छ । यस कार्यक्रमले रोजगारीका अवसर बढाउनुका साथै दिगो जीविकोपार्जनको आधार तय गर्ने र दक्ष जनशक्ति उत्पादन गर्ने लक्ष्य राखेको बताइएको छ ।
सन् २०२४ मा सुरु भएको यस अभियानअन्तर्गत हालसम्म १६ वटा प्रशिक्षण ब्याच सम्पन्न भइसकेका छन् । पोलिटेक्निक, इलेक्ट्रिकल र मेकानिकल विधामा केन्द्रित यस तालिममार्फत हालसम्म ३३२ जना युवाले व्यावसायिक शिक्षा प्राप्त गरिसकेका छन् भने हाल सुरु भएको १६औँ ब्याचमा १८ जना सहभागी छन् ।
प्रशिक्षणको शुभारम्भका अवसरमा एलजी इलेक्ट्रोनिक्स सिंगापुर–बंगलादेश शाखाका प्रबन्ध निर्देशक जेराल्ड संघो चुन र चौधरी फाउन्डेसनका अध्यक्ष निर्वाण चौधरीले प्रशिक्षण सत्रको अवलोकन गरेका थिए ।
फाउन्डेसनका अध्यक्ष निर्वाण चौधरीले व्यावहारिक सिपमार्फत मानिसलाई सक्षम बनाउनु सबैभन्दा अर्थपूर्ण लगानी भएको बताए ।
