नागरिक उड्डयनका पूर्वमहानिर्देशक अधिकारीविरुद्ध छैटौँ मुद्दा दायर
ठेक्कामा सहजीकरण गरिदिएबापत ठेकेदारसँग एक करोड ७१ लाख रुपैयाँ घुस लिएको अभियोगमा नेपाल नागरिक उड्डयन प्राधिकरणका तत्कालीन महानिर्देशक प्रदीप अधिकारीविरुद्ध घुस र सम्पत्ति शुद्धीकरणको मुद्दा दायर भएको छ । हाल पुर्पक्षका लागि थुनामा रहेका अधिकारीविरुद्ध यसअघि नै पाँच मुद्दा दायर भइसकेका छन् ।
अख्तियार दुरुपयोग अनुसन्धान आयोगले मंगलबार अधिकारीविरुद्ध मुद्दा दायर गरेको हो । उनले श्रीमतीको नाममा ललितपुरमा ११ आना जग्गा घुसबापत लिएको अख्तियारले पत्ता लगाएको छ । घुस लुकाउने, रूपान्तरण र हस्तान्तरणको कामसमेत गरेको भन्दै आयोगले सम्पत्ति शुद्धीकरणको मुद्दा पनि दायर गरेको हो ।
गायत्री निर्माण सेवालाई नागरिक उड्डयन प्राधिकरणअन्तर्गतका विभिन्न ठेक्काहरू दिलाएका थिए । त्यसबापत ठेकेदार प्रेमप्रकाश ढकालसँग एक करोड ७१ लाख घुस लिएका थिए । सो रकमले ललितपुरमा श्रीमतीको नाममा जग्गा खरिद गरेको अख्तियारले जनाएको छ ।
अख्तियारका अनुसार अधिकारीले गायत्री निर्माण सेवालाई नागरिक उड्डयन प्राधिकरणअन्तर्गतका विभिन्न ठेक्काहरू दिलाएका थिए । त्यसबापत ठेकदार प्रेमप्रकाश ढकालसँग एक करोड ७१ लाख घुस लिएका थिए । सो रकमले ललितपुरमा श्रीमतीको नाममा जग्गा खरिद गरेको अख्तियारले जनाएको छ । ९१ लाख थैली राखेर जग्गा पास गरिएको थियो । ९१ लाख अधिकारी र श्रीमतीकै खाताबाट जग्गा बिक्रेतालाई दिए पनि स्वाभाविक देखाउने कलुषित मनसाय राखेर खरिद–बिक्री गरिएको आयोगको दाबी छ । सो जग्गाको सबै पैसा ठेकदारले नै भुक्तानी गरेको आरोपपत्रमा उल्लेख छ । यसरी खरिद गरिएको जग्गासमेत जफतको माग पनि अख्तियारले गरेको छ ।
यसअघि नै अधिकारीविरुद्ध पोखरा विमानस्थलको निर्माणसम्बन्धी तीनवटा र भक्तपुरको हेलिपोर्ट निर्माणमा अनियमिततासम्बन्धी एउटा मुद्दा विशेष अदालतमा विचाराधीन छन् । त्यस्तै, अख्तियारका प्रमुख आयुक्त प्रेमकुमार राईलाई आपराधिक समूह प्रयोग गरी मार्ने धम्की दिएको र त्यसका लागि दुई करोड रुपैयाँ फिरौती दिएको विषयमा पनि प्रहरीमार्फत मुद्दा दायर भएको थियो । अकुत सम्पत्ति आर्जनलगायतका विषयमा अख्तियारले उनीविरुद्ध थप अनुसन्धान जारी राखेको छ ।
