फिफा विश्वकप फुटबल प्रतियोगिताको मंगलबार रातिबाट सेमिफाइनल खेल सुरु हुनेछ । स्पेन, इटाली, अर्जेन्टिना र इंग्ल्यान्ड सेमिफाइनलमा पुगेका छन् । विश्वकपमा सहभागी ४४ राष्ट्र घर फर्किएका छन् ।
विश्वकपबाट बाहिरिएका मध्ये कोलम्बिया पनि हो । प्रतियोगिताको प्रिक्वार्टरफाइनलमा कोलम्बियामा स्विट्जरल्यान्डसँग टाइब्रेकरमा पराजित भयो । यो खेल सकिएको एक हप्ता हुन लाग्यो । तर, अहिले कोलम्बियाका खेलाडी हामिन्तोन काम्पासलाई ज्यान मार्ने धम्की आइरहेको बिबिसीले जनाएको छ ।
स्विट्जरल्यान्डसँग टाइब्रेकरमा पराजित हुँदा कोलम्बियाको विश्वकप यात्रा समाप्त भयो । काम्पासले निर्धारित र अतिरिक्त समयमा स्विट्जरल्यान्डविरुद्ध सहज गोल अवसर चुकाएका थिए । काम्पासले गोल गर्न नसक्दा नै कोलम्बिया विश्वकपबाट बाहिरिएको आरोप लगाउँदै अज्ञात समूहले उनलाई ज्यान मार्ने धम्की दिएको बिबिसीले बताएको छ । कोलम्बियामा आफ्नो ज्यान सुरक्षित भएपछि उनले सरकारसँग सुरक्षामाग गरेका छन् ।
अमेरिकामै रहँदा काम्पासलाई ज्यान मार्ने धम्की आएको थियो । जसका कारण उनी टोलीसँगै घर फर्किएनन् । कोलम्बियन फुटबल महासंघले घटनाप्रति गम्भीर चिन्ता जनाएको छ । महासंघले खेलाडीलाई ज्यान मार्ने धम्की दिने व्यक्तिहरूको कडा आलोचना गरेको छ । काम्पासले इन्स्टाग्राममार्फत भावुक सन्देश सार्वजनिक गरेका छन् । ‘सानैदेखि कोलम्बियाको जर्सी लगाउने सपना थियो । यस विश्वकपमा मेरो सपना पूरा मात्र नभएर राष्ट्रिय गानसँग मैदानमा खेल्ने अवसर पनि पाएँ,’ काम्पासले भने, ‘लाखौँ समर्थकको प्रतिनिधित्व गर्ने र विश्वकपमा गोल गर्ने मेरो सपना थियो ।’
काम्पासले समूह चरणमा उज्वेकिस्तानविरुद्ध एक गोल गरेका थिए । अन्तिम १६ को खेलमा गुमाएको अवसरले उनलाई अहिले अत्यन्त कठिन परिस्थितिमा पुर्याएको छ । महासंघले देशको प्रतिनिधित्व गर्ने कुनै पनि खेलाडी वा उनका परिवारका सदस्यले धम्कीको सामना गर्नुपर्ने अवस्था आउनु सुरक्षा संयन्त्र कमजोर भएको बताएको छ । ‘काम्पास र उनको परिवारको सुरक्षा सुनिश्चित गर्न सम्बन्धित निकायसँग आग्रह छ,’ महासंघले भने ।
यसैगरी, काम्पासले पनि राष्ट्रलाई खुसी दिलाउन नसक्दा आफूलाई दुःख लागेको लेखेका छन् । ‘सबैले चाहेको खुसी दिलाउन नसकेकोमा म अत्यन्त दुःखी छु । यो जर्सीप्रतिको मेरो समर्पण, प्रतिबद्धता र प्रेममा कहिल्यै कमी थिएन,’ भावुक हुँदै उनले लेखेका छन्, ‘मैदानमा मैले आफ्नो सम्पूर्ण क्षमता देखाए । देशका लागि यही जिम्मेवारी म हजारौँपटक फेरि पनि निभाउन तयार छु ।’
सन् १९९४ को घटना स्मरण
यो घटनाले धेरैलाई सन् १९९४ को विश्वकपलाई झस्काएको छ । त्यसवेला कोलम्बियाले आयोजक अमेरिकाविरुद्ध प्रतिस्पर्धा गरेको थियो । प्रतिस्पर्धामा कोलम्बियाका डिफेन्डर एन्ड्रेस स्कोबारले आत्मघाती गोल गरेका थिए । उनको आत्मघाती गोलमा कोलम्बिया विश्वकपबाट बाहिरियो । कोलम्बिया बाहिरिनुको सबै दोष स्कोबारमाथि लगाइएको थियो । अमेरिकाको एक नाइटक्लबबाट बाहिरिने क्रममा उनीमाथि अज्ञात व्यक्तिले गोली ठोके । अस्पताल पुर्याउने क्रममा स्कोबारको निधन भयो ।
