नेपाली कलेज अध्ययन गरेको नक्कली कागजात तयार गरी विदेशी विद्यार्थीलाई अध्ययन भिसा दिलाउन भूमिका खेल्ने धन्दामा डा. सुबोध शुक्ला संगठित रूपमै संलग्न रहेको खुलेको छ । उनलाई अध्यागमन विभागले गत २८ जेठमा पक्राउ गरेको थियो । घटनाको अनुसन्धान काठमाडौं उपत्यका अपराध अनुसन्धान कार्यालयले गर्दै आएको छ ।
अनुसन्धान कार्यालयका अनुसार शुक्लाले हालसम्म २० भन्दा धेरै विदेशी विद्यार्थीलाई नेपाली कजेजमा अध्ययन गरेको भन्दै नक्कली कागजात तयार गरिदिएका थिए । उनीहरूले सोही आधारमा नेपालमा अध्ययन भिसा लिएका थिए । धन्दामा संलग्न चिनियाँ नागरिक वाङ जिङ्काओलाई पनि विभागले पक्राउ गरेको छ । भिसाका लागि उनीहरूले वाल्मीकि विद्यापीठको नक्कली कागजात तयार गर्दै आएको खुलेको छ । शुक्लाले प्रति विद्यार्थी दुई लाख ५० हजार रुपैयाँ लिनेको गरेको अनुसन्धानमा संलग्न एक प्रहरीले बताए ।
काठमाडौं उपत्यका अपराध अनुसन्धान कार्यालयका प्रमुख एसएसपी सन्तोष खड्काले शुक्लाले धेरै विदेशी विद्यार्थीलाई अध्ययन भिसाका लागि नक्कली कागजात तयारी गरिदिने गरेको खुलेको बताए । ‘वाल्मीकि विद्यापीठको नक्कली कागजात बनाइदिने र सोही आधारमा विदेशी विद्यार्थीलाई अध्ययन भिसा उपलब्ध गराइदिने भूमिकामा संलग्न केही अभियुक्त पक्राउ परेका छन् । उनीहरूविरुद्ध अनुसन्धान भइरहेको छ । उनीहरूले धेरै विदेशी विद्यार्थीलाई अध्ययन भिसाका लागि नक्कली कागजात तयारी गरिदिने गरेको अनुसन्धानबाट देखिन्छ । केही दिनभित्रै यसको विस्तृत विवरण सार्वजनिक हुनेछ,’ उनले भने ।
अनुसन्धान कार्यालयका अनुसार शुक्लाको समूहले एक महिनामा विभिन्न देशका २० जना विद्यार्थीलाई वाल्मीकि विद्यापीठमा भर्ना गरेको भन्दै किर्ते कागजात तयार गरेका थिए । जसमध्ये १० जनालाई गत १४ जेठ र बाँकी १० जनालाई २१ जेठमा कागजात बनाइदिएका थिए । सोही कागजातका आधारमा १४ जेठमा अध्ययन भिसा लिनेमध्ये पाँच चिनियाँ र दुई कोरियन नागरिक छन् । बाँकी तीन नागरिक भने अमेरिकी, स्विडिस र ब्रिटिस छन् । २१ जेठमा अध्ययन भिसा लिनेमध्ये आठजना चिनियाँ नागरिक छन् । दुईमध्ये एक रसियन र अर्को जर्मन नागरिक छन् ।
घटनाबारे अनुसन्धान भइरहेकाले अध्ययन भिसा लिने विदेशी विद्यार्थीको संख्या अझै बढ्न सक्ने एसएसपी खड्काले बताए । ‘नक्कली कागजातका आधारमा अध्ययन भिसा लिने विदेशी विद्यार्थीको संख्या थप बढ्न सक्ने देखिन्छ । घटना अनुसन्धानकै चरणमा रहेकाले यसमा थप कुरा नगरौँ,’ उनले भने ।
अध्यागमन विभागका अनुसार धन्दाका मुख्य योजनाकार शुक्ला गत २८ जेठमा दुई विदेशी नागरिक लिएर अध्ययन भिसाको प्रक्रिया अघि बढाउन कालिकास्थानस्थित कार्यालय पुगेका थिए । उनीसँगै दुई चिनियाँ नागरिक थिए । दुवैसँग वाल्मीकि विद्यापीठको लेटरहेडमा भिसाका लागि भन्दै सिफारिस गरिएको कागजात थियो । सँगै शिक्षा तथा खेलकुद मन्त्रालयको सिफारिसपत्र पनि थियो । विभागका निर्देशक टीकाराम ढकालले पेस भएको कागजात अध्ययन गरे । गतिविधि शंकास्पद देखिएपछि उनले दुवै विद्यार्थीसँग केही आधारभूत प्रश्न गरे । विद्यार्थीसँगै सोफामा बसेका शुक्ला सहजीकरणका लागि अघि बढे । ‘दुवै विद्यार्थी वाल्मीकिमा भर्ना भएका हुन् । म पनि त्यहीँ पठाउँछु । यी दुवै मेरा विद्यार्थी हुन् । यसमा शंका नगर्दा हुन्छ,’ उनले भने ।
विभागका निर्देशक ढकालले शुक्लालाई विद्यापीठको क्याम्पस प्रमुखको नाम र फोन नम्बर सोधे । उनी अकमकिन थाले । गतिविधि थप सन्देहपूर्ण देखिएपछि ढकालले भिसाका लागि आवेदन दिने विद्यार्थी र शुक्लाको सम्बन्धमा बुझ्न विद्यापीठमा तुरुन्तै कार्मचारी पठाए । सोधखोज गर्दा खुल्यो भिसाका लागि आवेदन दिने कुनै विद्यार्थी कलेजमा भर्ना नभएको र शुक्लाबारे पनि जानकारी नभएको खुल्यो । त्यसलगत्तै विभागले शुक्लालाई पक्राउ गरी थप अनुसन्धानका लागि प्रहरीको अनुसन्धान कार्यालय पठायो ।
‘यो मान्छे (डा. शुक्ला) विगतदेखि नै विदेशी विद्यार्थी लिएर विभाग आउने रहेछ । महिना दिनको अवधिमा मात्रै यसले २० जना विदेशी विद्यार्थीलाई अध्ययन भिसाका लागि नक्कली कागजात तयार गरेर दिएको देखिन्छ । सोही आधारमा भिसा पनि जारी भएको देखिन्छ । यद्यपि, अनुसन्धान हुँदै छ । थप तथ्य खुल्दै जालान्,’ विभागका निर्देशन ढकालले भने । प्रहरीका अनुसार यो धन्दमा नाम चलेका केही अधिवक्तासमेत संलग्न छन् । उनीहरूविरुद्ध पनि अनुसन्धान भइरहेको प्रहरीको भनाइ छ ।
अध्यागमन विभागका निर्देशक टीकाराम ढकाल भन्छन् – यो मान्छे (डा. शुक्ला) विगतदेखि नै विदेशी विद्यार्थी लिएर विभाग आउने रहेछ । महिना दिनको अवधिमा मात्रै यसले २० जना विदेशी विद्यार्थीलाई अध्ययन भिसाका लागि नक्कली कागजात तयार गरेर दिएको देखिन्छ । सोही आधारमा भिसा पनि जारी भएको देखिन्छ । यद्यपि, अनुसन्धान हुँदै छ । थप तथ्य खुल्दै जालान् ।
