रास्वपा बागमतीको सभापतिमा मकवानपुरका उत्सव अर्याल विजयी

राष्ट्रिय स्वतन्त्र पार्टी (रास्वपा) बागमती प्रदेशको नयाँ सभापतिमा मकवानपुरका उत्सव अर्याल निर्वाचित भएका छन् । अत्यन्त प्रतिस्पर्धात्मक निर्वाचनमा अर्यालले निवर्तमान सभापति डा. अच्युतम लामिछानेलाई मात्र दुई मतले पराजित गरेका हुन् ।

शनिबार सम्पन्न निर्वाचनको अन्तिम मतपरिणामअनुसार अर्यालले ४१६ मत प्राप्त गरेका छन् भने उनका निकटतम प्रतिद्वन्द्वी डा. लामिछानेले ४१४ मत प्राप्त गरेका छन् । रास्वपाले पहिलोपटक बागमती प्रदेशको नेतृत्व चयनका लागि विद्युतीय मतदान मेसिन (इभिएम) प्रयोग गरेको थियो ।

जेठ २६ मा मतदाता नामावली, समायोजन सूची र निर्वाचन व्यवस्थापनलाई लिएर विवाद भएपछि स्थगित गरिएको निर्वाचन शनिबार पुनः सञ्चालन गरिएको थियो । रास्वपाले प्रदेशस्तरीय अधिवेशनको सुरुवात बागमती प्रदेशबाट गरेको थियो । १३ जिल्लाबाट करिब एक हजार दुई सय प्रतिनिधि सहभागी भएको अधिवेशनमा निर्वाचन प्रक्रिया सुरु भएसँगै विवाद उत्पन्न भएको थियो ।

मतदाता नामावली, समायोजन सूची तथा उम्मेदवारहरूको विवरणलाई लिएर प्रतिनिधिहरूले असन्तुष्टि जनाएपछि मतदान प्रक्रिया स्थगित गरिएको थियो । त्यसपछि केन्द्रीय निर्वाचन आयोगले प्राविधिक सुधार, मतदाता प्रमाणीकरण तथा व्यवस्थापकीय तयारी पूरा गरेर पुनः निर्वाचनको मिति घोषणा गरेको थियो ।

५१ प्रतिशत मतसहित निर्वाचित

रास्वपाको विधानअनुसार प्रदेश सभापतिमा निर्वाचित हुन कुल सदर मतको कम्तीमा ५१ प्रतिशत मत प्राप्त गर्नुपर्ने व्यवस्था छ । निर्वाचन समितिका अनुसार अर्यालले आवश्यक मत प्रतिशत हासिल गरेपछि उनी प्रत्यक्ष रूपमा सभापतिमा निर्वाचित भएका हुन् ।

सभापति पदका लागि प्रारम्भिक रूपमा पाँचजनाले उम्मेदवारी दिएका थिए। तर, अन्तिम नामावली प्रकाशनअघि प्रतिनिधिसभा सदस्य बदन भण्डारीले उम्मेदवारी फिर्ता लिएपछि प्रतिस्पर्धा चारजनामा सीमित भएको थियो ।

निर्वाचनमा निवर्तमान सभापति तथा नुवाकोट– २ का प्रतिनिधिसभा सदस्य डा. अच्युतम लामिछाने, मकवानपुरका उत्सव अर्याल, धादिङका कृष्णमान श्रेष्ठ र रामेछापका हरिबहादुर (एचबी) खत्री प्रतिस्पर्धामा थिए । पहिलो चरणको मतदानपछि अन्ततः अर्याल र लामिछानेबिच मुख्य प्रतिस्पर्धा केन्द्रित भएको थियो ।

सदस्य चयन सम्पन्न, बाँकी पदाधिकारी दोस्रो चरणबाट

निर्वाचन समितिका अनुसार पहिलो चरणको निर्वाचनबाट सभापति र प्रदेश सदस्यहरूको चयन भइसकेको छ । अब दोस्रो चरणको निर्वाचनमार्फत उपसभापति, महामन्त्री, सहमहामन्त्री, कोषाध्यक्ष, प्रवक्तालगायत अन्य पदाधिकारीहरूको टुंगो लगाइनेछ ।

रास्वपाको विधानअनुसार प्रदेश कार्यसमिति ६५ सदस्यीय हुनेछ । कार्यसमितिमा सभापतिसहित विभिन्न पदाधिकारी र समावेशी प्रतिनिधित्वका आधारमा सदस्यहरू रहने व्यवस्था छ ।

केन्द्रीय संगठन विभागका उपप्रमुख कृष्णमान श्रेष्ठले सभापति पदको निर्वाचन सम्पन्न भए पनि अन्य पदाधिकारीहरूको चयन दोस्रो चरणको निर्वाचनबाट हुने जानकारी दिए।