झापाको दमक नगरपालिका– १० स्थित रतुवाखोलामा १६ जेठमा बोरामा पोको पारिएको अवस्थामा मृत भेटिएकी २१ वर्षीया रमा तिवारीको हत्या शारीरिक सम्पर्कका लागि पैसाको विवाद हुँदा भएको खुलेको छ । नेपाल प्रहरीको संयुक्त टोलीले गरेको सघन अनुसन्धानबाट हत्यामा संलग्न भारत बिहार (अररिया ग्राम पञ्चायत) घर भई हाल दमक– ५ बस्ने ३३ वर्षीय राकेशकुमार पण्डितलाई पक्राउ गरेपछि यो तथ्य बाहिर आएको हो ।
जिल्ला प्रहरी कार्यालय झापाकी प्रमुख प्रहरी उपरीक्षक (एसपी) वसुन्धरा खड्काका अनुसार मृतक तिवारी र आरोपित पण्डित एक–अर्काका लागि अपरिचित थिए । १३ जेठमा राति घरबाट निस्किएकी रमाको दमक– ९ स्थित चियादोकान चोकमा पण्डितसँग भेट भएको थियो । बाटोमा भेटिएपछि दुवैबिच शारीरिक सम्पर्कका लागि सहमति भयो । पण्डितले एटिएमबाट पैसासमेत निकाले । त्यसपछि उनीहरू दमक– ५ मा रहेको एउटा झाडीमा पुगेका थिए । त्यसपछि रमाले पूर्वसहमतिविपरीत थप पैसा मागेपछि दुईबिच विवाद सुरु भएको पण्डितले प्रहरी बयानमा बताएका छन् । सोही विवाद बढ्दै जाँदा पण्डितले घाँटी थिचेर रमाको हत्या गरेको प्रहरीको प्रारम्भिक अनुसन्धानले देखाएको छ ।
यो क्रूर हत्याकाण्डको रहस्य सुल्झाउन कोशी प्रदेश प्रहरी कार्यालय विराटनगर, नेपाल प्रहरी प्रदेश प्रहरी कार्यालय धरान र इलाका प्रहरी कार्यालय दमकको संयुक्त टोली खटिएको थियो । इलाका प्रहरी कार्यालय दमकका प्रमुख प्रहरी नायब उपरीक्षक हरिबहादुर बस्नेतको कमान्डमा खटिएको टोलीले पण्डितलाई उनकै डेराबाट पक्राउ गरेको हो । पक्राउ परेका पण्डितविरुद्ध ज्यानसम्बन्धी कसुर र जबर्जस्ती करणी कसुरमा जिल्ला अदालत झापाबाट पाँचच दिनको म्याद थप गरी हिरासतमा राखेर अनुसन्धान भइरहेको प्रहरीले जनाएको छ ।
१३ जेठको राति करिब ११ बजे हत्या गरेपछि पण्डित शव छाडेर आफ्नो डेरामा पुगेका थिए । शव व्यवस्थापनका लागि उनले डेराबाट बोरा र पाइप लिएर आए । प्रहरीका अनुसार शव लान उनले मोटरसाइकलसमेत परिवर्तन गरेका थिए । मध्यरातको करिब १२ बजे उनले रमाको शवलाई बोरामा पोको पारी घटनास्थल (दमक–५) बाट करिब १५ किलोमिटर दक्षिणमा पर्ने दमक– १० स्थित रतुवाखोलामा पुर्याएर फालेका थिए । १६ जेठमा शव सडेर दुर्गन्धित अवस्थामा फेला परेको थियो ।
हत्याको भोलिपल्टै मन्दिरमा माफी, शव भेटिएकै दिन भारत फरार
अनुसन्धानका क्रममा आरोपीको अनौठो व्यवहारसमेत फेला परेको छ । मध्यरातमा हत्या गरेका पण्डित ‘प्रायश्चित’ गर्न भोलिपल्ट अर्थात् १४ जेठ बिहान साढे ६ बजे नै दमक– ६ स्थित पशुपति मन्दिर पुगेर माफी मागेका थिए । उनी मन्दिर पुगेको दृश्य सिसिटिभी फुटेजमा समेत कैद भएको छ । १६ जेठमा रतुवाखोलामा शव भेटिएकै दिन उनी लुक्नका लागि भारत पुगेका थिए । तर, सुरक्षित ठानी दुई दिनपछि पुनः दमकस्थित आफ्नै डेरामा फर्किएका उनलाई प्रहरीले बिहीबार केरकारका लागि नियन्त्रणमा लिएको हो ।
