नेपालले एसियन खेलकुद प्रतियोगिताअन्तर्गत महिला क्रिकेट छनोटमा चीनलाई १९ रनले पराजित गरेको छ । मलेसियाको क्वालालम्पुरमा बुधबार भएको समूह ‘बी’को प्रतिस्पर्धामा पहिलो ब्याटिङ गरेको नेपालले २० ओभरमा पाँच विकेट गुमाएर १२५ रनको योगफल खडा गर्यो । प्रत्युत्तरमा चीनले २० ओभरमा पाँच विकेटको क्षतिमा १०६ रन जोड्दा नेपाल १९ रनले विजयी भयो । चीनको यो दोस्रो खेल हो । चीनले समान एक जित र हार सामना गरेको छ ।
समूह ‘बी’को पहिलो खेलमा चीनले इन्डोनेसियालाई पाखा लगाएको थियो । नेपालको भने यो पहिलो खेल हो । रनरेट बलियो बनाएको नेपाल २ अंकका साथ शीर्ष स्थानमा रह्यो । चीन दोस्रो स्थानमा रहँदा एक खेल खेलेको इन्डोनेसिया तेस्रो स्थानमा छ ।
प्रतियोगिताअन्तर्गत समूह ‘ए’को खेलमा थाइल्यान्डले आयोजक मलेसियामाथि सात विकेटको सानदार जित निकाल्यो । मलेसियाले पहिलो ब्याटिङ गर्दै २० ओभरमा सात विकेटको क्षतिमा ९२ रन जोड्यो । थाइल्यान्डले १२.३ ओभरमा तीन विकेटको नोक्सानीमा ९५ रन बनाएको थियो । थाइल्यान्डले समूह ‘बी’मा लगातार दोस्रो जित निकाली ४ अंक बनाएको छ । थाइल्यान्ड शीर्ष स्थानमा छ । मलेसिया र हङकङले समान एक खेल खेल्दा अंक बटुल्न सकेका छैनन् ।
पूजाको अर्धशतकीय इनिङ्स
नेपालको जितमा उपकप्तान पूजा महतोले अर्धशतकीय इनिङ्स खेलिन् । उनले ५७ बलमा ६ चौकाको सहयोगमा सर्वाधिक ६३ रनको योगदान दिइन् । ओपनिङ खेलाडीकी रूपमा क्रिजमा प्रवेश गरेकी पूजा इनिङ्सको १९.३ ओभरमा रनआउट भइन् । उनले रुबी पोद्दारसँग चौथो विकेटका लागि ६४ रनको बलियो साझेदारी गर्दै टोलीलाई ५६–३ बाट १२०–४ को स्थितिमा राखिन् । रुबीले नटआउट रहँदा २५ बलमा एक चौकाको सहयोगमा २२ रन बनाइन् । नेपालको ब्याटिङमा सोनी पाख्रिनले २४ बलमा दुई चौका प्रहार गरी १८ रन बनाइन् । कप्तान इन्दु बर्मा सामना गरेको बलमै आउट भइन् । पूर्वकप्तान रुविना क्षेत्रीले ४ रनको योगदान दिइन् । बलिङमा चीनकी मा रुकिईले चार ओभरमा २६ रन खर्चेर सर्वाधिक दुई विकेट हात पारिन् । वाङ र जिपिङले समान एक विकेट लिए ।
नेपालको कसिलो बलिङ
१२६ रनको लक्ष्य पछ्याएको चीनले नेपालमाथि दबाब बनाइराखेको थियो । शीर्ष चार ब्याट्सम्यानले संयमित रूपमा ब्याटिङ गर्दा नेपाल इनिङ्सको केही समयमा दबाबमा आएको थियो । ओपनर जिपिङ ली र वेइ हेटिङले पहिलो विकेटका लागि ६.२ ओभरमा ३० रनको साझेदारी गरेका थिए । जिपिङले २४ बलमा दुई चौकाको सहयोगमा १५ रन बनाइन् ।
त्यसपछि हेटिङ र कप्तान मियायु झाउले दोस्रो विकेटका लागि २९ रनको साझेदारी गर्दै टोलीलाई ११.१ ओभरमा ५९–२ को स्थितिमा राखे । हेटिङले २६ बल सामना गरी १८ रन बनाइन् । कप्तान मियायुले २८ बलमा ३० रनको योगदान दिइन् । उनी इनिङ्सको १५.६ ओभरमा आउट भइन् । उनलाई मनीषा उपाध्यायले रुविना क्षेत्रीबाट क्याच आउट गराइन् । हेटिङले २१ रन बनाइन् । उनी रिया शर्माको ओभरमा एलबिडब्लू भइन् ।
नेपालले चीनलाई लक्ष्यसम्म पुग्न नदिन कसिलो बलिङ गरेको थियो । नेपालका लागि मनीषाले चार ओभरमा ११ रन खर्चेर दुई विकेट लिइन् । यसैगरी रियाले चार ओभरमा एक मेडन राखी १८ रन दिएर दुई विकेट लिइन् । कविता कुँवर र पूजाले पनि समान एक विकेट हात पारे ।
