आजबाट मतदाता शिक्षा कार्यक्रम, बदर मत घटाउन मकवानपुरमा १०२ वडामा स्वयंसेवक परिचालन

२०७९ सालको प्रतिनिधिसभा निर्वाचनमा ४.४६ प्रतिशत मत बदर भएको मकवानपुरमा बदर मत घटाउने लक्ष्यसहित आज आइतबारदेखि मतदाता शिक्षा कार्यक्रम सञ्चालन हुँदै छ । १८ दिनपछि हुन गइरहेको प्रतिनिधिसभा सदस्य निर्वाचनलाई लक्षित गर्दै प्रदेश निर्वाचन कार्यालय, हेटौँडाले कार्यक्रम सुरु गर्न लागेको हो ।

प्रदेश निर्वाचन कार्यालय हेटौँडाका प्रमुख हरिप्रसाद ढकालका अनुसार मतदाता शिक्षा प्रभावकारी बनाउन प्रत्येक पालिकाबाट एक–एकजना अनुगमनकर्तालाई तालिम दिइसकिएको छ । तालिमप्राप्त अनुगमनकर्ताले आफ्नो पालिकाको प्रत्येक वडाबाट एक–एकजनालाई तालिम दिएपछि वडा तहमा मतदाता शिक्षा कार्यक्रम सञ्चालनमा ल्याइएको उनले बताए ।

उनका अनुसार प्रत्येक वडामा बालविकास सहजकर्ता वा महिला स्वास्थ्य स्वयंसेविकालाई मतदाता शिक्षा स्वयंसेवकका रूपमा परिचालन गरिनेछ । १० पालिकाका १०२ वडामा एक–एकजना स्वयंसेवक खटाइने कार्यालयले जनाएको छ ।

स्वयंसेवकहरूले घरदैलोमार्फत मतदातालाई नमुना मतपत्र प्रयोग गरेर मतदान प्रक्रिया, मतपत्र कसरी सही तरिकाले छाप लगाउने र मत बदर हुन नदिने उपायबारे जानकारी गराउनेछन् । कार्यक्रमको अनुगमन निर्वाचन कार्यालयबाट तालिमप्राप्त अनुगमनकर्ताले गर्ने ढकालले बताए ।

‘मतदान प्रक्रियालाई सहज र सरल बनाउने, मतदातालाई सचेत गराउने र बदर मतको प्रतिशत घटाउने उद्देश्यले फागुन १७ गतेसम्म मतदाता शिक्षा कार्यक्रम सञ्चालन गरिनेछ,’ प्रमुख ढकालले भने । मतदाता शिक्षाले निर्वाचनमा सहभागिता वृद्धि र मतको गुणस्तर सुधारमा महत्त्वपूर्ण भूमिका खेल्ने कार्यालयको अपेक्षा छ ।

दुई प्रतिनिधिसभा निर्वाचन क्षेत्र रहेको मकवानपुरमा क्षेत्र नम्बर १ मा एक लाख ५८ हजार ४३५ र क्षेत्र नम्बर २ मा एक लाख ५६ हजार ८९९ मतदाता रहेका छन् । जिल्लाको कुल मतदाता संख्या तीन लाख १५ हजार ३३४ छ। तीमध्ये एक लाख ५३ हजार ३७६ महिला र पाँचजना अन्य मतदाता रहेका छन् । निर्वाचन कार्यालयले मतदातालाई मताधिकारको महत्त्व बुझेर सचेत रूपमा मतदान प्रक्रियामा सहभागी हुन पनि मतदाताहरूलाई आग्रह गरेको छ।