भारतको मेघालय राज्यको पूर्वी जयन्तिया हिल्समा रहेको एक कोइला खानीमा भएको विस्फोटमा मृत्यु हुने नेपालीको संख्या नौ पुगेको छ। विस्फाेट गत २२ माघ (५ फेब्रुअरी २०२६) मा भएको थियो ।
नेपाली राजदूतावास, नयाँदिल्लीका अनुसार सोही दुर्घटनामा सातजना नेपाली नागरिक घाइते भएका छन् । घाइतेहरूको स्थानीय अस्पतालमा उपचार भइरहेको छ । नौ नेपालीसहित सो विस्फाेटमा हालसम्म २७ जनाको मृत्यु भएको भारतीय सञ्चारमाध्यमले जनाएका छन्।
नेपाली राजदूतावासले घाइतेहरूको उपचार, मृतकका परिवार तथा घाइतेहरूलाई क्षतिपूर्ति उपलब्ध गराउने विषयमा भारतको विदेश मन्त्रालय, स्थानीय प्रशासन र प्रहरीसँग निरन्तर समन्वय गरिरहेको जनाएको छ । आवश्यक जानकारी वा सहजीकरणका लागि पीडित परिवारलाई राजदूतावासको हटलाइन नम्बरमा सम्पर्क गर्न अनुरोध गरिएको छ ।
प्रारम्भिक जानकारीअनुसार उक्त कोइला खानी अवैध रूपमा सञ्चालन हुँदै आएको बताइएको छ । गैरकानुनी रूपमा सञ्चालन भएका यस्ता कार्यस्थलमा दुर्घटना भएमा उद्धार, उपचार तथा क्षतिपूर्तिमा समस्या आउने भएकाले रोजगारीमा जानुअघि पर्याप्त जानकारी लिन राजदूतावासले नेपाली नागरिकलाई सचेत गराएको छ ।
राजदूतावासले अपरिचित व्यक्ति वा मध्यस्थकर्ताको प्रलोभनमा नपरी, रोजगारदाता कम्पनी, तलब तथा सेवा–सुविधाबारे स्पष्ट जानकारी लिएर र आवश्यक औपचारिक प्रक्रिया पूरा गरेर मात्र रोजगारीमा संलग्न हुन आग्रह गरेको छ ।
