पाकिस्तानले भारतमा गएर नखेल्ने निर्णय लिएसँगै विश्व क्रिकेटलाई लगभग २५ करोड अमेरिकी डलर आर्थिक क्षति हुने अनुमान गरिएको छ । पाकिस्तानले आगामी १५ फेब्रुअरीमा भारतसँगको खेल उनीहरूको भूमिमा नखेल्ने निर्णय लिएको छ । पाकिस्तानले भारतबाहेक श्रीलंकामा छिमेकी राष्ट्रसँग प्रतिस्पर्धा गर्ने प्रस्ताव आइसिसीसमक्ष राखेको थियो । तर, आइसिसीले पूर्ववत् खेलतालिका र मैदान परिवर्तन नहुने जनाउँदा पाकिस्तान सरकारले भारत नजाने निर्णय लिएको हो । आइसिसीले पाकिस्तानलाई आर्थिक दण्ड लगाउने अधिकार राखेको छ ।
भारत–पाकिस्तान खेलको विश्वव्यापी दर्शक संख्या अर्बभन्दा बढी हुने र यसको आर्थिक मूल्य अत्यन्त ठुलो रहेको दी सिड्नी मोर्निङ हेराल्डले जनाएको छ । राजनीतिक तनावका कारण भारत र पाकिस्तानबिचको प्रतिस्पर्धा विश्वकपकै बहुप्रतिक्षित खेलका रूपमा रहेको छ ।
यी दुई राष्ट्रबिचको खेललाई आइसिसीले सबैभन्दा ठुलो व्यावसायिक आकर्षण मानेको छ । यसैकारण आइसिसीले भारत र पाकिस्तानबिचको खेल एकै समूहमा राख्दै आएको छ । पाकिस्तानको पछिल्लो निर्णयका कारण आइसिसी र भारतको मिडिया अधिकारधारी जियोस्टारलई पनि आर्थिक झट्का लाग्नेछ । जियोस्टारले आइसिसीसँग गरेको तीन अर्ब डलरको सम्झौता पुनर्विचार गर्ने प्रयाससमेत गरिरहेको छ । प्रसारणकर्तालाई मात्रै २४ देखि ३० मिलियन डलर बराबरको विज्ञापन घाटा हुन सक्ने अनुमान छ । भारत–पाकिस्तानबिचको खेलमा १० सेकेन्ड विज्ञापनको मूल्य ४८ हजार डलर अमेरिकी डलर तोकिएको छ ।
