बर्दीवासस्थित नवनिर्मित मिथिलानगरी आर्मी गल्फ क्लबमा मंगलबारदेखि सूर्य नेपाल गल्फ टुर २०२५–२६ अन्तर्गत सूर्य नेपाल एनपिजिए टुर च्याम्पियनसिप हुँदै छ । विजेताले एक लाख ७० हजार र उपविजेताले एक लाख २५ हजार रुपैयाँ प्राप्त गर्नेछन् । तेस्रो स्थानमा रहने गल्फरले एक लाख रुपैयाँ हात पार्नेछन् । आयोजकका अनुसार शीर्ष १८ स्थानभित्र पर्ने गल्फर पुरस्कृत हुनेछन् ।
नेपालका एक नम्बर प्रोफेसनल गल्फर नीरज तामाङसँगै भुवन नगरकोटी, धन थापा, दिनेश प्रजापति र जयराम श्रेष्ठ उपाधिका दाबेदार खेलाडीका रूपमा रहेका छन् । नीरजले अघिल्लो साता धरानमा भएको सूर्य नेपाल इस्टर्न ओपन जितेका थिए । मिथिला गल्फ कोर्समा तीन दिनसम्म चल्ने प्रतियोगिता ५४ होलको हुनेछ । जहाँ ३१ प्रोफेसनल गल्फर, ह्यान्डिक्याप र ६ एमेच्योर गल्फरले उपाधिका लागि दाबेदारी प्रस्तुत गर्नेछन् ।
३६ होलको सामाप्तिपछि कट लागू हुनेछ । शीर्ष १८ प्रोफेसनल र एमेच्योर खेलाडी फाइनल राउन्डमा प्रवेश गर्नेछन् । मधेश प्रदेशमा सूर्य नेपाल गल्फ पहिलोपटक हुनलागेको हो । आर्मीको नयाँ गल्फ कोर्समा खेल्ने चुनौती खेलाडीलाई रहनेछ । सूर्य नेपाल गल्फ टुर २०२५–२६ अन्तर्गत आठ प्रतियोगिता हुनेछन् । सूर्य नेपाल सेन्ट्रल ओपनको उपाधि एमेच्योर खेलाडी राहुल विश्वकर्माले जितेका थिए ।
