वाणगंगा नगरपालिका–१०, भावपुरस्थित एक होटेलमा जुवा खेलिरहेका होटेल सञ्चालकसहित पाँचजनालाई प्रहरीले नियन्त्रणमा लिएको छ। प्रहरीले उनीहरूको साथबाट ठुलो मात्रामा नगद र अन्य सामग्रीसमेत बरामद गरेको छ।
इलाका प्रहरी कार्यालय पिपराका प्रहरी निरीक्षक अर्जुन पौडेलका अनुसार पक्राउ परेकाहरूको साथबाट दुई लाख ५६ हजार २९० रुपैयाँ नगद, ६ थान मोबाइल फोन र तीन बुक तास बरामद गरेको छ । भावपुरमा दिनेश थारूले सञ्चालन गर्दै आएको रोयल सिटी कटेज एन्ड रेस्टुरेन्टमा जुवा खेलिरहेको सूचनाका आधारमा छापा मारेर उनीहरूलाई नियन्त्रणमा लिएको प्रहरीको भनाइ छ ।
कपिलवस्तुका प्रहरी नायब उपरीक्षक तथा सूचना अधिकारी रिपेन्द्रकुमार सिंहले भने, ‘जुवातास नियन्त्रणका लागि नियमित अनुगमन गरिरहेका छौँ। होटेलभित्र जुवा खेलिरहेको अवस्थामा नगद र सामग्रीसहित उनीहरू पक्राउ परेका हुन्। घटनाबारे थप अनुसन्धान भइरहेको छ।’
नियन्त्रणमा लिइएकामध्ये रुपन्देहीको कञ्चन गाउँपालिका–५, पिपरी चापाका ३५ वर्षीय दिलीप थापा, सोही ठाउँ भैसाही बस्ने ३२ वर्षीय कमल थापा, गौडी बस्ने ३३ वर्षीय दीपेन्द्र घर्ती रहेका छन्। त्यसैगरी, कपिलवस्तु वाणगंगा नगरपालिका–१० बनकट्टी बस्ने ३५ वर्षीय अर्जुन चौधरी तथा होटेल सञ्चालक ३५ वर्षीय दिनेश थारू पनि पक्राउ परेका प्रहरीको भनाइ छ ।
