रुसले संयुक्त राज्य अमेरिकाले सुरु गरेको शान्ति वार्तालाई प्रभाव पार्ने प्रयासमा युक्रेन अभियान तीव्र बनाएको छ । यस क्रममा मस्कोले युक्रेनमा हासिल सैन्य उपलब्धिलाई बढाइचढाइ गरिरहेको छ । जस्तो, भर्खरै डिसेम्बर १८ मा रुसी कमान्डर–इन–चिफ भ्यालेरी गेरासिमोभले विदेशी सैन्य अधिकारीलाई वार्षिक प्रतिवेदनबारे बताउँदै रुसले यो वर्ष युक्रेनको ६ हजार ३०० वर्ग किलोमिटर कब्जा गरेको दाबी गरे । त्यसको एक साताअघि रुसी रक्षामन्त्री आन्द्रेई बेलोसोभले यो संख्या ६ हजार वर्ग किमि बताएका थिए ।
तथापि, वासिंटनस्थित थिंक ट्यांक ‘इन्स्टिच्युट फर द स्टडी अफ वार (आइएसडब्लु)’ले भूउपग्रह तथा खुला स्रोत प्रमाणका आधारमा रुसले चार हजार ९८४ वर्ग किलोमिटरभन्दा बढी कब्जा नगरेको बतायो । अमेरिका र युक्रेनी वार्ताकारले शान्ति योजनामा वार्तालाई तीव्र बनाइरहेको सन्दर्भमा रुसी दाबी आएका छन् । उता बुधबार युक्रेनी राष्ट्रपति भ्लोदिमिर जेलेन्स्कीले अमेरिकासँग सहमत भएको २०बुँदे योजना सार्वजनिक गरे ।
तथापि, योजनामा सबैभन्दा संवेदनशील भूमिको मुद्दामा अमेरिका र युक्रेनबिच अझै सहमति हुन बाँकी रहेको देखिन्छ । रुसले युक्रेनलाई क्रिमियाको अतिरिक्त डोनेत्स्क, लुहान्स्क, जापोरिजिया र खेरसनका सम्पूर्ण भूमि सुम्पनुपर्ने माग गरेको छ ।
