स्टकहोम/ यस वर्षको भौतिकशास्त्रतर्फको नोबेल पुरस्कार बेल्जियन मूलका अमेरिकी वैज्ञानिक फ्रान्सिस हल्जेनलाई प्रदान गरिएको छ । नोबेल समितिले मंगलबार यस वर्षको भौतिकशास्त्रतर्फको विजेताको नाम घोषणा गरेको थियो । ‘आइसक्युब न्युट्रिनो अब्जर्भेटरी’मा काम गर्दा खगोलीय उत्पत्तिका उच्च ऊर्जाका न्युट्रिनोको खोजका लागि उनलाई यो पुरस्कार दिइएको हो ।
‘हल्जेनले अनुसन्धानकर्ता र इन्जिनियरहरूको अन्तर्राष्ट्रिय टोलीको नेतृत्व गर्दै हामीलाई एउटा अद्भुत उपकरण उपलब्ध गराएका छन् । उनको दृढता र वैज्ञानिक दूरदृष्टिले खगोल विज्ञानको नयाँ विधिको बाटो खोलेको छ,’ भौतिक शास्त्रतर्फको नोबेल समितिका अध्यक्ष मार्क पियर्सले विज्ञप्तिमार्फत भने ।
बेल्जियममा जन्मिएका ८२ वर्षीय हल्जेन अमेरिकाको युनिभर्सिटी अफ विस्कन्सिन–म्याडिसनसँग आबद्ध रहेको समाचार संस्था एसोसिएटेड प्रेसले जनाएको छ । ‘आइसक्युब न्युट्रिनो अब्जर्भेटरी’ अन्टार्कटिका महादेशको दक्षिणी ध्रुवमा रहेको अनुसन्धान केन्द्र हो । यसको नेतृत्व गर्ने संस्थामा हल्जेन कार्यरत ‘युनिभर्सिटी अफ विस्कन्सिन–म्याडिसन’ रहेको छ । न्युट्रिनो अत्यन्तै कम अन्तरक्रिया गर्ने सूक्ष्म कण हुन् । यस्ता कणको अध्ययनमार्फत ब्रह्माण्डका अत्यन्त ऊर्जावान् खगोलीय घटनाबारे नयाँ जानकारी प्राप्त गर्न सकिन्छ ।
