सुदूरपश्चिम रोयल्सका हेमन्त धामी तथा लुम्बिनी लायन्सका स्पिनर शेर मल्लमध्ये एक खेलाडीले उपाधि भिडन्तमा व्यक्तिगत रेकर्ड राख्ने निश्चित थिए । सुदूरपश्चिम जित्दा हेमन्त र लुम्बिनीले बाजी मार्दा शेर लगातार दोस्रोपटक च्याम्पियन बन्ने सँघारमा थिए । गत वर्ष जनकपुर बोल्ट्स च्याम्पियन हुँदा यी दुवै खेलाडी टोलीका महत्वपूर्ण खेलाडी थिए । यस सिजनमा जनकपुरले अक्सन अगाडि शेर र हेमन्तलाई रिलिज गरेको थियो ।
अक्सनमा शेरलाई लुम्बिनी र हेमन्तलाई सुदूरपश्चिमले भित्र्याएको थियो । लुम्बिनी च्याम्पियन भएसँगै शेर फरक–फरक टोलीबाट च्याम्पियन बन्ने पहिलो खेलाडी बनेका छन् । लुम्बिनीलाई पहिलोपटक च्याम्पियन बनाउने क्रममा उनले १० खेलमा ४६ रन बनाए । उनले एक चौका र चार छक्का प्रहार गरेका थिए ।
बलिङ क्रममा उनले १७ विकेट हात पारेका छन् । गत सिजन जनकपुरलाई उपाधि दिलाउने क्रममा शेरले आठमध्ये सात इनिङ्समा बलिङ गर्दै सात विकेट हात पारेका थिए ।
त्यसवेला उनको उत्कृष्ट प्रदर्शन ३/११ रहेको थियो । गत सिजनमा उनी धेरै विकेट लिने सूचीको २५औँ स्थानमा थिए । उनले जनकपुरबाट आठमध्ये पाँच इनिङ्समा ब्याटिङ गरी २४ रन जोड्दा तीन छक्का लगाएका थिए ।
