दोस्रो संस्करणको सिद्धार्थ बैंक नेपाल प्रिमियर लिग (एनपिएल) को १३औँ खेलमा सुदूरपश्चिम रोयल्ससँग सात विकेटले पराजित हुँदा लुम्बिनी लोयल्स लिग चरणबाटै बाहिरिने अवस्थामा थियो । लिगको १७औँ खेलमा पोखरा एभेन्जससँग भिड्दा लुम्बिनी गर या मरको अवस्थामा पुगेको थियो । यो खेलमा पराजित हुँदा लुम्बिनीको शीर्ष चारको स्थान समीकरण समाप्त हुने थियो । तर, उसले पोखरालाई तीन विकेटले हराउँदै प्लेअफ आशा कायमै राख्यो । पोखराविरुद्धको जित लुम्बिनीलाई ‘लक्की’ साबित भयो ।
त्यसपछि लुम्बिनीले खेलमा फर्केर हेर्नुपरेन । लगातार ६ खेल जित्दै दोस्रो एनपिएलको ट्रफी नै लुम्बिनीले उचाल्यो । प्लेअफमा स्थान सुरक्षित नहुँदासम्म कप्तान रोहित पौडेलले लिग चरणका अन्तिम खेल नकआउट रूपमा रहेको प्रतिक्रिया दिएका थिए । उनी भन्थे, ‘लिग चरणमा पोखरा, विराटनगर र जनकपुरसँगका खेल लुम्बिनीले नकआउटजस्तै लिएको थियो । हारले लिग चरणबाटै बाहिरिने अवस्थामा हामी पुगेका थियौँ ।’
पोखरासँगको खेलपछि टिमवर्कको भावनामा प्रतिस्पर्धा गर्दै लुम्बिनीले बलिया टोलीलाई परास्त गर्दै सहजै फाइनलसम्म स्थान बनायो । त्रिवि अन्तर्राष्ट्रिय क्रिकेट मैदानमा सुदूरपश्चिमविरुद्धको फाइनल रोमाञ्चक हुने अपेक्षा थियो । तर, फाइनल एक किसिमले एकपक्षीयजस्तै भयो । रोहितको ह्याट्रिक, शेर मल्ल तथा रुबेन ट्रम्पेलम्यानले समान तीन विकेट लिँदा लगातार दोस्रोपटक फाइनल खेलिरहेको सुदूरपश्चिम केवल ८४ रनमै समेटियो ।
८५ रनको सहज लक्ष्य पछ्याएको इनिङ्समा ओपनर दिनेश अधिकारीले दीपेन्द्रसिंह ऐरीको पहिलो ओभरमै २७ रन खोसेपछि लुम्बिनीले उपाधि भिडन्त नौ ओभरमै सकायो । लुम्बिनीले पावर प्लेमा दुई विकेट गुमाएर ६२ रन जोडेको थियो । गत सिजनमा लुम्बिनी पुछारमा रहेको थियो । दोस्रो सिजनमा उत्कृष्ट प्रदर्शन गरी लुम्बिनीले उपाधि जितेको हो ।
लगातार ६ खेलमा जित
लिग चरणको पहिलो चार खेलसम्म लुम्बिनीले एक जित निकालेको थियो । आफ्नो पहिलो खेलमा उसले चितवनलाई ६ विकेटले हराएको थियो । कर्णालीसँग ९ विकेट, काठमाडौं गोर्खाजसँग २२ रन तथा सुदूरपश्चिमबाट सात विकेटले पराजित हुँदा लुम्बिनी अंकतालिकाको सातौँ स्थानमा थियो । अर्कोतिर, तत्कालका साबिक विजेता जनकपुर बोल्ट्सले एक खेलमा पनि जित निकाल्न नसक्दा आठौँ स्थानमा थियो । रनरेटमा मात्र लुम्बिनी जनकपुरभन्दा एक स्थानमाथि रहेको थियो । पाँचौँ खेलमा पोखराविरुद्धको जितले आत्मविश्वासका साथ लुम्बिनीले प्रत्येक खेलमा प्रतिस्पर्धा गर्यो । छैटौँ खेलमा विराटनगरलाई पाँच विकेटले हराएको लुम्बिनीले लिगकै अन्तिम खेलमा जनकपुरलाई चारै विकेटले हराउँदै आठ अंकका साथ शीर्ष चारमा पुग्यो । त्यसपछि इलिमिनेटरमा लुम्बिनीले काठमाडौं गोर्खाजलाई ४ विकेटले हराउँदै क्वालिफायर २ मा स्थान सुरक्षित गर्यो । फाइनल प्रवेशको खेलमा लुम्बिनीले विराटनगरमाथि ४० रनको एकपक्षीय जित निकालेर फाइनलमा स्थान बनायो । लुम्बिनीले च्याम्पियनशैलीमै फाइनलमा सुदूरपश्चिमलाई स्तब्ध पार्दैै लगातार ६ खेलमा अपराजित रहँदै उपाधि जित्न सफल भयो ।
बलिङमा बलियो लुम्बिनी
रमाइलो पक्ष के छ भने, लुम्बिनी च्याम्पियन हुँदा कुनै पनि ब्याट्सम्यानले अर्धशतकीय योगदान दिएनन् । दोस्रो एनपिएल भरी नै कप्तान रोहितले कर्णाली याक्सविरुद्ध ४९ रन नै सर्वाधिक रह्यो । ब्याटिङमा मध्य प्रदर्शन गरेको लुम्बिनीले फास्ट तथा स्पिन बलमा उत्कृष्ट प्रदर्शन गरेको थियो । विशेषत: इलिमिनेट देखि फाइनलसम्म उनीहरूको प्रदर्शन अब्बल रहे । स्पिनमा शेर मल्ल, रोहित, अभिषेक गौतम तथा तिलकराज भण्डारीले प्रत्येक खेलमा सुधारिएको प्रदर्शन गरी टोलीलाई च्याम्पियन बनाए । विरानटगरविरुद्धको क्वालिफायर २ मा भण्डारीले १५ रन तीन विकेट लिए । शेरले सोही खेलमा दक्षिण अफ्रिकाका पूर्वकप्तान फाफ डु प्लेसिसलाई आउट पारे । नामिबियाका फास्ट बलर रुबेन ट्रम्पेलम्यानले पहिलो ओभरमै सनसनीपूर्ण रूपमा दुई विकेट लिएका थिए । उपाधि भिडन्तमा रोहितले ह्याट्रिकसमेत गरे । दोस्रो एनपिएलमा सर्वाधिक विकेट लिने शीर्ष पाँचमध्ये दुई बलर लुम्बिनीका छन् । तेस्रो स्थानमा शेर तथा चौथो स्थानमा रुबेन रहे । यसैगरी, कप्तान रोहित नवौँ स्थानमा छन् ।
दोस्रोपटक चुक्यो सुदूरपश्चिम
पहिलो सिजनमाझैँ दोस्रोमा पनि सुदूरपश्चिमले लिग चरणदेखि क्वालिफायर वानसम्म उत्कृष्ट प्रदर्शन गरेको थियो । लिग चरणको आफ्नो अन्तिम खेलमा विराटनगर किंग्सबाहेक अन्य ६ खेलमा सुदूरपश्चिमले विपक्षीमाथि एकपक्षीय जित निकाली क्वालिफायर वानमा स्थान बनाएको थियो । लिग चरणमा लगातार ६ खेल निकालेको सुदूरपश्चिम अन्तिम खेलमा विराटनगरबाट ६ विकेटले पराजित भएको थियो । सुदूरपश्चिमले क्वालिफायर वानमा विराटनगरलाई ७७ रनले हराउँदै सहजै फाइनलमा स्थान पक्का गर्यो । लगातार दोस्रोपटक फाइनल स्थान बनाएको सुदूरपश्चिमले लुम्बिनीविरुद्ध ब्याटिङ र बलिङमा कमजोर प्रदर्शन गर्यो । गत सिजनमा जनकपुरविरुद्ध पहिलो ब्याटिङ गर्दै नौ विकेट गुमाएर १८४ रनको बलियो योगफल बनाएको थियो । तर, जनकपुरले १९.२ ओभरमा पाँच विकेट गुमाएर सुदूरपश्चिमलाई उपाधि जित्न वञ्चित बनायो । दोस्रोपटकको उपाधि भिडन्तमा सुदूरपश्चिमले फितलो ब्याटिङ गर्दा नै उपाधि हात पार्न नसकेको हो ।
