रोहितको ह्याट्रिकपछि लुम्बिनीलाई सुदूरपश्चिमले दियो ८६ रनको लक्ष्य

शनिबार, २७ मंसिर, २०८२
डिजिटल संस्करण

कप्तान रोहितकुमार पौडेलले ह्याट्रिक विकेटसहित उत्कृष्ट बलिङ गरेपछि लुम्बिनी लायन्सले दोस्रो सिद्धार्थ बैंक नेपाल प्रिमियर लिग (एनपिएल)को फाइनलमा सुदूरपश्चिम रोयल्सलाई सस्तैमा समेटेको छ । शनिबार कीर्तिपुरस्थित त्रिवि मैदानमा सुदूरले लुम्बिनीलाई मात्र ८६ रनको लक्ष्य दियो ।  

टस जितेर सुरुमा ब्याटिङ गरेको सुदूरले १९ ओभरमा सबै विकेट गुमाउँदा मात्र ८५ रन बनायो । टोलीको इनिङ्समा ठूलो साझेदारी हुनै पाएन । 

रोहितले ह्याट्रिक विकेट लिए । रोहितले ११औं ओभर लगातार तीन विकेट लिएका हुन् । उनले १०.४ ओभरमा सुदूरका कप्तान दीपेन्द्रसिंह ऐरीलाई १३ रन बनाउँदा आउट गराए । दीपक बोहरालाई १०.५ तथा १०.६  ओभरमा पुनीत मेहरालाई डक आउट गराएका हुन् । ह्याट्रिक विकेट पछि उनी ओनर बक्समा ‘फ्ल्याइगं किस’ दिन पुगेका थिए । 

रोहित प्रतियोगितामा ह्याट्रिक लिने दोस्रो खेलाडी बनेका छन् ।  यसअघि काठमाडौंका शाहव आलमले पोखराविरुद्ध ह्याट्रिक विकेट लिएका थिए । योसँगै रोहितले प्रतियोगितामा १० विकेट लिएका छन् । 

सुदूरको इनिङ्समा ओपनर इशान पाण्डेले सर्वाधिक ३३ रन बनाए । उनले ५१ बलमा १ चौकामात्रै प्रहार गरे । १६.३ ओभरसम्म क्रिजमा टिकेका इशानलाई शेर मल्लले श्रीलंकन अलराउन्डर मोभिन सुवासिंघाबाट क्याच आउट गराएका थिए । 

त्यसबाहेक कप्तान दीपेन्द्र सिंह ऐरीले २० बलमा १३ रन बनाए । हर्मित सिंह र स्कट कुगुलेइनले पनि १० रन मात्रै बनाएर पेभिलियन फर्किएका थिए । यसबाहेक कुनै पनि खेलाडीले दोहोरो अंकमा रन बनाउन सकेनन् । 

यसअघि दुई अर्धसतक बनाएका विनोद भण्डारी डक आउट भए । दोस्रो खेल खेलिरहेका भारतीय ब्याटर सेल्डन ज्याकसन पनि एक रन बनाएर आउट भएका थिए । ६ रन बनाएका आरिफ शेखलाई शेर मल्लले एलबिडब्लु धरापमा पारे । रोहितले एघारौं ओभरमा दीपक बोहरा र पुनीत मेहराको विकेट लिँदै ह्याट्रिक गरेपछि सुदूरपश्चिमको ब्याटिङ दबाबमा आएको थियो । 

लुम्बिनीको लागि रोहित, शेर मल्ल र रुवेन ट्रम्पलम्यानले समान ३ विकेट लिए । रोहितले ४ ओभरमा १२ रन खर्र्चिए । त्यस्तै शेर मल्लले पनि ३ विकेट लिए । शेरले चार ओभरमा १८ रन खर्चिएका हुन् । उनी सन्दीप लामिछानेसँगै सर्वाधिक समान १७ विकेट लिने खेलाडीको सूचीमा दोस्रो स्थानमा छन् । रुवेन ट्रम्पलम्यानले २.१ ओभमार मात्र ३ रन खर्चिएर तीन विकेट लिएका थिए । अभिशेस गौतम र मोभिन भने विकेट विहिन भए । 

सुदूरपश्चिमले पहिलो क्वालिफायर्समा विराटनगर किंग्सलाई ७७ रनले हराउँदै फाइनलमा प्रवेश गरेको थियो । लुम्बिनीले पनि दोस्रो क्वालिफायर्समा विराटनगरलाई नै ४० रनले हराएको हो । यसअघि सुदूरपश्चिम सर्वाधिक १२ अंक जोड्दै प्लेअफमा पुगेको थियो भने ८ अंकको लुम्बिनी चौथो टोलीको रुपमा अन्तिम चारमा प्रवेश गरेको हो । 

लुम्बिनी र सुदूरपश्चिम दुबै पहिलो पटक उपाधि उचाल्ने योजनामा छन् । सुदूरपश्चिम लगातार तथा लुम्बिनी पहिलो पटक फाइनलमा प्रवेश गरेका हुन् । मंसिर १ बाट सुरु भएको प्रतियोगिताको आज समापन हुँदैछ ।
 

See More On

सुझावित समाचार