जंगली हात्तीको आक्रमणबाट एक वृद्धको मृत्यु

सप्तरीको कञ्चनरूप नगरपालिकामा जंगली हात्तीको आक्रमणबाट एक वृद्धको ज्यान गएको छ। मृत्यु हुनेमा कञ्चनरूप नगरपालिका– ५, पिप्रा पूर्वनिवासी ६५ वर्षीय नारायण खङ रहेका छन्। ​इलाका प्रहरी कार्यालय कञ्चनरूपका प्रमुख डिएसपी माधवप्रसाद काफ्लेका अनुसार मृतक खङ घरबाट करिब दुई किलोमिटर टाढा रहेको आफ्नै खेतमा काटेर राखिएको धान कुर्न गएका थिए।

​खेतमा सुकाइराखिएको धान जोगाउन उनी त्यहीँ सुतिरहेका थिए। सोही क्रममा कोशी टप्पु वन्यजन्तु आरक्षतर्फबाट आएको जंगली हात्तीले सुतिरहेकै अवस्थामा उनलाई अचानक आक्रमण गरी कुल्चिएको प्रहरीले जनाएको छ। ​हात्तीको आक्रमणबाट गम्भीर घाइते भएका खङलाई स्थानीयवासीले उद्धारको प्रयास गरे पनि बचाउन सकेनन्। उनको घटनास्थलमै ज्यान गएको बताइएको छ।