मोरङको कटहरी गाउँपालिका–१ जमटोकीमा रहेको कृषि थोक बजारपरिसरबाट कोशी प्रदेश सभाको सचिवालय सञ्चालनमा आएको छ ।
प्रदेश सभाको सचिवालय र संसद भवन जेन–जी आन्दोलनमा जलेर ध्वस्त भएपछि अलपत्र अवस्थामा रहेको कटहरीस्थित कृषि थोक बजारबाट बुधबार सभाको सचिवालय सञ्चालनमा आएको हो । सचिवालयमा सभामुख अम्बरबहादुर विष्ट, उपसभामुख श्रृजना दनुवार कार्यकक्षमा प्रवेश गरेका छन् । कृषि थोक बजारपरिसरभित्रै सबै संसदीय दलको कार्यालय, मिडिया सेन्टर र संसद सभाहल र चमेनागृह पनि सञ्चालन हुनेछ । सुविधासम्पन्न भए पनि प्रयोगविहीन रहेको उक्त कृषि बजारको कार्यालयलाई कटहरी गाउँपालिकाका केही कर्मचारीहरूले डेराको रूपमा प्रयोग गर्दै आएका थिए ।
जेन–जी आन्दोलनका क्रममा २४ भदौमा विराटनगरको देवकोटा चोकमा रहेको प्रदेश सभा सचिवालय र संसद बैठक भवन आगजनीबाट ध्वस्त भएको थियो । अब नयाँ स्थानबाट सचिवालय सञ्चालनमा आएसँगै कोशी सरकारले आगामी मंसिर दोस्रो हप्ताभित्रै कोशी प्रदेश सभाको हिउँदे अधिवेशनका आह्वान गराउने तयारी गरेको सरकारका प्रवक्ता मन्त्री रेवतीरमण भण्डारीले बताए ।
यसकारण अलपत्र थियो कृषि बजार
जमटोकीमा रहेको प्रदेश कृषि थोक बजार केन्द्र संघीय कृषि विकास मन्त्रालयको व्यवसायिक कृषि तथा व्यापार आयोजना (प्याक्ट)अन्तर्गत ०७५ सालमा स्थापना भएको हो । त्यसवेला कुला १७ करोड लागतमा बजार निर्माण भएको थियो । प्रदेशको कृषि विकासका लागि स्थापना गरिएको अत्याधुनिक फलफुल तथा तरकारी बजारमा विराटनगरका व्यापारी जान नमान्दा प्रयोगविहीन अवस्थामा थियो ।
३ चैत ०७५ मा संघीय सरकारको कृषि तथा पशुपक्षी मन्त्रालयले निर्माण गराएको उक्त्त थोक बजार संरक्षणसहित सञ्चालनका लागि प्रदेश सरकारलाई हस्तान्तरण गरेको थियो ।
कृषि थोक बजार पाँच बिगाहा दुई धुरमा फैलिएको छ । बजारमा ३८ वटा थोक र एउटा खुद्रा बिक्री कक्ष छन् ।
बैकिङ सुविधासहितको आधुनिक प्रशासनिक भवन, शौचालय, चमेनागृह, डिप ट्युबेल, सिसी टिभी, सवारी पार्किङलगायतका सुबिधा यहाँ उपलव्ध छ । बजारमा होलसेल पसल राख्न १४ सय ८८ वर्गमिटरको भवन र ३ सय ५१ वर्गमिटरको खुद्रा विक्री भवन निर्माण गरिएका छन् । बजारमा प्रति वर्गमिटर ३० टन तरकारी भण्डारण क्षमता रहेको छ ।
प्रदेश सभा सचिवमा खड्का नियुक्त्त
कोशी प्रदेश सभाको सचिवमा सुदर्शन खड्का नियुक्त भएका छन् । सभामुख अम्बरबहादुर विष्टको सिफारिसमा बुधबार कोशी प्रदेश प्रमुख परशुराम खापुङले खडकालाई नियुक्त्त गरेका हुन् ।
उनी तत्काल प्रतिनिधि सभाको सचिव रहेका थिए । सभामुख विष्टले सपथग्रहण गराएसँगै सचिव खडकाले बुधबारदेखि नै कार्यभार सम्हालेका छन् ।
