जेन–जी प्रर्दशनको कारण रोकिएको दोस्रो संस्करणको एभरेस्ट महिला भलिबल लिगको बाँकी खेलका तालिका सार्वजनिक गरिएको छ । रोकिएको प्रतियोगिता २६ देखि २९ कार्तिकसम्म काठमाडाैंमा हुने गरी आयोजकले आइतबार तालिका सार्वजनिक गरेको हो ।
इन्फनिटी ड्रिम्स प्रालिको आयोजनामा पोखरा रंगशालास्थित बहुउदेश्य कभर्ड हलमा २० भदौदेखि सुरु प्रतियोगिता जेन–जी प्रर्दशनका कारण २४ भदौदेखि रोकिएको थियो । ६ फ्रेन्चाइजी टोलीले प्रतिस्पर्धा गरेको लिगको बाँकी खेलको लागि सार्वजनिक खेल तालिकाअनुसार २६ कार्तिकमा पहिलो खेल कर्णाली यसबिस र मधेस युनाइेटेडबिच हुनेछ भने दोसो खेलमा ललितपुर क्विन्स र पोखरा निन्जाज भिड्नेछन् । २७ कार्तिकमा पहिलो खेल काठमाडौं स्पाइकर्स र पोखराबिच हुँदा दोस्रो खेलमा लुम्बिनी लाभा र मधेशले प्रतिस्पर्धा गर्नेछन् । २८ कार्तिकमा पहिलो खेलमा काठमाडौँ र लुम्बिनी भिड्दा दोस्रो एवं लिग चरणको अन्तिम खेलमा कर्णाली र ललितपुरले प्रतिस्पर्धा गर्नेछन् ।
लिग चरणका खेल २८ कार्तिकमा सकिएसँगै उपाधिका लागि २९ कार्तिकमा हुने फाइनल खेलमा लिगको अंकतालिकामा पहिलो र दोस्रो नम्बरमा रहेका दुई टोलीबिच प्रतिस्पर्धा हुने गरी तालिका सार्वजनिक गरिएको छ ।
यस्तो छ नौ खेलको अंक तालिका
लिगमा सहभागी ६ टोलीले समान पाँच पाँच खेल खेल्ने तालिका रहेकोमा चार दिनको खेल सकिदा प्रतिस्पर्धी सबै टोलीले समान तीन तीन खेल मात्र खेलेका छन् । लिग चरणका खेलपछि अंक तालिकामा पहिलो र दोस्रो स्थानमा रहेका टोलीले उपाधिका लागि प्रतिस्पर्धा गर्ने छन् ।
समान तीन -तीन खेल सकिँदा अपराजित रहेको पहिलो संस्करणको उपविजेता ललितपुर र गत वर्षको उपाधि विजेता कर्णालीको समान नौ अंक रहेको छ । दुई टोलीको समान नौ अंक भए पनि सेटको आधारमा हाल ललितपुर तालिकाको शीर्ष स्थानमा छ ।
अन्य चार टोलीमध्ये मधेश, काठमाडौं र लुम्बिनीले समान तीन खेलमा दुईमा हार र एकमा जित हात पार्दै अंकतालिकामा समान तीन अंकका साथ मधेश तेस्रो र काठमाडौँ चौथो स्थानमा छ । यसै गरि दुई अंकका साथ लुम्बिनी पाँचौँ स्थानमा रहँदा तीन खेलमै पराजित भएको घरेलु टोली पोखरा निन्जाज एक अंकका साथ पुछारमा छ ।
