बर्दियामा चितुवाको आक्रमणबाट एक महिलाको मृत्यु भएको छ। चितुवाको आक्रमणबाट गुलरिया नगरपालिका– ११, टडुवाकी ३६ वर्षीया कविता तामाङ रानाको मृत्यु भएको हो ।
घरनजिकको नेपाल केदुवाई सामुदायिक वनमा घाँस काट्न गएकी रानालाई बिहान ९ बजे चितुवाको आक्रमणबाट गर्दा मृत्यु भएको वडा १२ अध्यक्ष रामकुमार थारूले बताए ।
एक महिला पहिला यसै वडाकी जगतरानी थारूलाई चितुवाले आक्रमण गरेको थियो । गाउँमा दिनहुँजस्तो चितुवा आएर कुकुर, बाख्रालगायतका घरपालुवा जनावर खाने गरेको स्थानीय भूपेन्द्र बिसीले बताए । उनले भने, ‘गाउँमा चितुवा देखिन थालेपछि स्थानीय त्रसित बनेका छन् भने विद्यालयमा जान विद्यार्थी यही बाटो भएर हिँड्छन्, उनीहरूलाई पनि विद्यालय जान डर भएको छ ।’
डिभिजन वन कार्यालय बर्दियाको कार्यालय प्रमुखलाई पटकपटक फोन गर्दा पनि फोन नउठाउने गरेको बिसीले गुनासो गरे । गत आर्थिक वर्षमा चितुवाको आक्रमणबाट चारजनाको मृत्यु भएको थियो । जसमध्ये दुईजना गुलरियाका रहेका थिए ।
