पोखरा महानगरपालिकाभित्र बसोबास गर्ने विद्यार्थीले दक्षिण कोरियास्थित युङजिन विश्वविद्यालयमा प्राविधिक शिक्षा अध्ययनका लागि छात्रवृत्तिको अवसर पाउने भएका छन् ।
यसका लागि पोखरा महानगरपालिकाका र कोरियाको युङजिन विश्वविद्यालयबिच बुधबार पोखरामा छात्रवृत्ति आदानप्रदान गर्नेसम्बन्धी समझदारीपत्रमा हस्ताक्षर भएको हो । समझदारी पत्रमा पोखरा महानगरका मेयर धनराज आचार्य र युङजिनकातर्फबाट प्राध्यापक चोइ जेइयोङले हस्ताक्षर गरेका थिए ।
हस्ताक्षरसँगै प्राविधिक शिक्षा अध्ययनका लागि पोखरेलीले अवसर पाउने भएका हुन् । पारस्परिक लाभ, समानता, पारदर्शिता र साझा विकासको सिद्धान्तमा आधारित रहेर समझदारी गरिएको मेयर आर्चायले जानकारी दिए । समझदारीपछि भएको प्रारम्भिक छलफलमा पोखराका १०–१५ जनालाई विश्वविद्यालयमा हरेक वर्ष छात्रवृत्ति पाउने गरि कुरा भएको मेयर आर्चायले बताए । सूचना प्रविधिको पढाई हुने सो विश्वविद्यालमा स्नातकोत्तर तह, एमफिल र पिएचडिका लागि पोखरेलीले अध्ययनको अवसर पाउने भएका हुन् ।
समझदारीअनुसार शैक्षिक विकासका सन्दर्भमा पोखरा महानगरपालिका क्षेत्रको अन्तर्राष्ट्रिय प्रतिस्पर्धात्मक क्षमता अभिवृद्धि गर्दै प्राज्ञिक, साँस्कृतिक र प्राविधिक सहयोगमार्फत दुई देशबिच अन्तर्राष्ट्रिय सम्बन्ध र पारस्परिक विकासमा जोड दिइने आर्चायले बताए ।
महानगरपालिका र युङजिनबिच अनुकूल शैक्षिक कार्यक्रमहरू, भ्रमण, भर्चुअल शिक्षा, शिक्षा, पर्यटन र प्रविधिको क्षेत्रमा अन्तर्राष्ट्रिय सहयोगलाई समर्थन गर्न मानव संसाधन तथा सूचना आदानप्रदान, सहरी विकास, पर्यटन र दिगो अभ्यासलगायत पारस्परिक हितका क्षेत्रमा संयुक्त अनुसन्धान र नवप्रवर्तन परियोजनाहरूमा सहकार्य गरिने छ । समझदारीले पोखराबाट वैदेशिक अध्ययनका लागि कोरिया जाने विद्यार्थीहरूलाई उनीहरूको अध्ययन, सामाजिक सुरक्षा र न्यूनतम रोजगारीमा विश्वविद्यालयले आवश्यक सहजीकरण गर्ने सँगै विद्यार्थीको अन्तर्राष्ट्रिय छात्रवृत्तिमा पहुँच स्थापित गर्ने उनले बताए ।
युङजिन विश्वविद्यालयका प्राध्यापक चोइ जेइयोङले विशेषगरी प्राविधिक शिक्षा, मानव संसाधन र पारस्परिक लाभका विषयहरूमा पोखरासँग सहकार्य गरी नजिकबाट काम गर्न चाहेको बताए । सहकार्यले दुबै पक्षलाई सहयोग पुग्ने उनको दाबी छ ।
