प्रधानमन्त्री केपी ओलीले रासायनिक मलको आपूर्तिलाई चुस्त बनाउने ठोस योजना तीन दिनभित्र ल्याउन विभागीय मन्त्रीहरूलाई निर्देशन दिएका छन् । प्रधानमन्त्री ओलीले कृषि तथा पशुपक्षी विकासमन्त्री रामनाथ अधिकारी र उद्योग, वाणिज्य तथा आपूर्तिमन्त्री दामोदर भण्डारीलाई ‘रासायनिक मलको आपूर्ति व्यवस्था चुस्तदुरुस्त गराउन नयाँ ढाँचासहितको ठोस योजना तीन दिनभित्र ल्याउन’ निर्देशन दिएका हुन् ।
रासायनिक मल आवश्यक मात्रामा मौज्दात रहँदा पनि मल अभाव भएको गुनासो आइरहेको भन्दै प्रधानमन्त्रीले मंगलबार सिंहदरबारमा विभागीय मन्त्री, सचिव र कर्मचारीलाई बोलाएर ‘कृषि मल व्यवस्थापन र उत्पादनवृद्धि’बारे छलफल गरेका थिए । छलफपछि प्रधानमन्त्रीले तीनबुँदे निर्देशन दिएका हुन् ।
प्रधानमन्त्रीले ‘रासायनिक मलको आपूर्ति व्यवस्था चुस्तदुरुस्त गराउन नयाँ ढाँचासहितको ठोस योजना ल्याउन’, ‘कम्पोस्ट र अर्गानिक मलको उत्पादन र प्रयोगका लागि राष्ट्रिय अभियान सञ्चालन तथा यसमा अनुदान नीतिको प्रस्ताव ल्याउन’ र ‘माटोको उर्वरता बचाउने खालको रासायनिक मल कारखाना नेपालमै खोल्ने अध्ययनको खाका ल्याउन’ निर्देशन दिएका हुन् ।
