उपचारमा लापरबाहीका कारण २८ महिने बालिकाको मृत्यु भएको ठहर गर्दै उपभोक्ता अदालतले काठमाडौंस्थित हिमाल अस्पताल र त्यहाँ कार्यरत चिकित्सक डा. जगदेव यादवलाई एक करोड ४५ लाख ४४ हजार १ सय रुपैयाँ क्षतिपूर्ति भराउन आदेश दिएको छ । अदालतका अध्यक्ष रामप्रसाद शर्मा तथा सदस्यद्वय गेहेन्द्रराज रेग्मी र आनन्दराम पोख्रेलको इजलासले अस्पतालले मेडिकल लापरबाही गरेको र गुणस्तरीय सेवा दिन असफल भएको ठहर गर्दै यो क्षतिपूर्ति आदेश गरेको हो ।
स्रेस्तेदार शोभाकर खरेलका अनुसार यो अहिलेसम्मकै ठुलो क्षतिपूर्ति भराउने आदेश हो । ‘यो हालसम्मको उपभोक्ता अदालतको क्षेत्रमा सबैभन्दा ठुलो क्षतिपूर्तिको आदेश हो । अदालतले प्रमाणको आधारमा अस्पतालको सेवामा देखिएको कमजोरी नै बालिकाको मृत्युको मुख्य कारण ठहर गरेको छ,’ उनले भने । उनका अनुसार अस्पताललाई ७० प्रतिशत र डा. यादवलाई ३० प्रतिशत जरिवाना भराउने आदेश भएको छ । आदेशअनुसार अस्पतालले १ करोड १ लाख ८० हजार ८ सय ७० रुपैयाँ र डा. यादवले ४३ लाख ६३ हजार २ सय ३० रुपैयाँ क्षतिपूर्ति दिनुपर्नेछ ।
अदालतमा दायर उजुरीपत्रअनुसार गंगा गौतमले छोरी प्रशंसालाई रुघाखोकी र ज्वरो आएपछि गत २३ माघमा उपचारका लागि हिमाल अस्पताल लगेकी थिइन् । त्यहाँ डा. यादवले परीक्षण नै नगरी रुघाखोकीको औषधि लेखेर दिएका थिए । पटक–पटक अस्पताल लैजाँदा पनि उपचारमा बेवास्ता गरेको र २५ माघमा साँझ थप उपचारका लागि अस्पताल लैजाँदा एक्सरे परीक्षण गरी जटिल प्रकारको निमोनिया भइसकेको भेटिएको थियो ।
त्यसपछि अस्पतालले आइसियू नभएकाले उपचार सम्भव नभएको भन्दै अन्यत्र रिफर गरेको उजुरीपत्रमा उल्लेख छ । अन्य ठाउँमा लैजाँदै गर्दा बालिकाको बाटोमै मृत्य भएको थियो । त्यसपछि बालिकाका बुवा गंगाले उपभोक्ता अदालतमा क्षतिपूर्तिको दाबीसहित मुद्दा दायर गरेका थिए । यसअघि अदालतले उपचारमा लापरबाही मुद्दामा ओम हस्पिटललाई ५० लाख ७० हजार क्षतिपूर्ति भराउने फैसला गरेको थियो ।
