तेस्रो नेपाल सुपर लिगमा धेरै गोल गर्ने विदेशी खेलाडीको दबदबा

तेस्रो नेपाल सुपर लिग (एनएसएल)मा पूर्ण रूपमा विदेशी खेलाडी हाबी हुँदा ललितपुर सिटी एफसीले दोस्रोपटक उपाधि जित्यो । यसपटक फ्रेन्चाइज लिगको सुरुमै स्वदेशीभन्दा विदेशी खेलाडीको दबदबाको पूर्वानुमान थियो । राष्ट्रियस्तरका चार दर्जनभन्दा बढी खेलाडी विदेश पलायन भएपछि अक्सनअगाडि स्वदेशी खेलाडीको अभाव भयो । 

जसका कारण आयोजकले तेस्रो संस्करणमा एकैपटक ६ विदेशी खेलाडीलाई अनुबन्ध गर्न पाउने प्रावधान बनायो । झापा, बुटवल–लुम्बिनीबाहेक पाँच टोलीले समान ६ खेलाडी अनुबन्ध गरेका थिए । फ्रान्स, इंग्ल्यान्ड, ब्राजिल, घाना, कोलम्बिया, मोरक्कोलगायतका १९ देशबाट एनएसएल खेल्न आए । चार खेलाडीले दशरथ रंगशालामा आफ्नो जादुमयी खेल देखाएका थिए । श्रम ऐन, २०७४ र श्रम नियमावली, २०७५ विना विदेशी खेलाडी मैदान उतारेको विषय पनि चर्चा नभएको होइन । लिगमा नाइजेरियाबाट सर्वाधिक ६ खेलाडी अनुबन्ध भए । उज्वेकिस्तानबाट पाँच र सेनेगलबाट चार खेलाडी नेपाल आएका थिए ।

 सात टोली सहभागी लिगमा एक सय २० भन्दा बढी नेपाली खेलाडीले रोजगारी पाएका थिए । तर, नेपाली खेलाडीको तुलनामा विदेशी खेलाडी पूर्ण रूपमा हाबी भए । गोल गर्ने सूचीमा पनि विदेशी नै अगाडि रहे । नेपाली खेलाडी जर्ज प्रिन्स कार्की र सुदिल राईले दुई गोल गरे । आदित्य शाक्य, नीरज चौधरी, कृतिशरत्न छुन्जु, समीर तामाङ, मणिकुमार लामा, अनन्त तामाङ, सन्तोष खत्री, आयुष घलान, नवीन लामा, लाकेन लिम्बूले जया गुरुङ पनि गोल गरेका थिए । एनएसएलमा भएका तीनवटै आत्मघाती गोल पनि नेपाली खेलाडीका नाममा रह्यो । झापाका दीपेश धिमाल, धनगढीका अमृत श्रेष्ठ र चितवनका अभिषेक लिम्बूले आत्मघाती गोल गरेका थिए । 

 अमाडोउ डिओप (काठमाडौं रेन्जर्स), गोल : ४
पहिलो संस्करण च्याम्पियन भएको काठमाडौंले त्यसपछि राम्रो प्रदर्शन गर्न सकेन । तेस्रो संस्करणमा उपाधि जित्ने योजना बनाउँदा अमाडोउ डिओपलाई विदेशी खेलाडीको कोटाबाट अनुबन्ध गर्यो । रोहन कार्की मार्की रहेको काठमाडौंले सेनेगलमा २९ वर्र्षीय अमाडोउ डिओपले उत्कृष्ट प्रदर्शन गरे । लिगको पाँचौँ स्थानमा रहेको काठमाडौंका लागि अमाडोउले चार गोल गरे । उनले पहिलो खेलमा ललितपुरविरुद्ध २–० ले पछि हुँदा पुनरागमन गराएका थिए । त्यस्तै, बुटवल, धनगढी र चितवनविरुद्ध गोल गरे । तर, यसपटक टोली लिग चरणबाट माथि बढ्न सकेन । 

 अहमद हिजाजी (धनगढी एफसी), गोल : ५ 
धनगढीका लागि खेलेका लेबनानका अहमद हिजाजीले लगातार आफ्नो प्रभावशाली प्रदर्शन देखाउन सफल भए । यसपटक उनको नाममा एउटा ह्याट्रिक रह्यो । आठ खेल खेल्दा ३० वर्षीय हिजाजीले पाँच गोल गरे । यसपटक उनी नै सर्वाधिक गोलकर्ताको सूचीमा रहे । काठमाडौंविरुद्ध ह्याट्रिक गरेका उनले बुटवल–लुम्बिनीविरुद्ध दुई गोल गरेका थिए । सहिद स्मारक ‘ए’ डिभिजन लिगमा नेपाल पुलिस क्लबबाट खेल्दै हिजाजी नेपाली फुटबलमा भित्रिएका हुन् ।

पछिल्लोपटक भएको ‘ए’ डिभिजन लिगमा पुसिललाई रेलिगेसन क्षेत्रबाट जोगाउँदै हिजाजीले तेस्रो स्थानमा पनि पुर्याए । दोस्रो संस्करण पनि धनगढीबाट खेलेका उनले सानदार प्रदर्शन गरे । धनगढी र हिजाजीको लगातार तेस्रोपटक फाइनल खेल्ने सपना पूरा हुन सकेन । इलिमिनेटरमा पोखरासँग पराजित हुँदा धनगढी बाहिरियो । यसअघिका दुवै संस्करणमा धनगढी उपविजेता बनेको थियो । हिजाजीले चितवन एफसीविरुद्ध विश्राम लिँदा सबै खेल खेलेका थिए । 

 जोनाथन कान्टिलाना  (ललितपुर एफसी) गोल : ३ 
प्यालेस्टाइनका जोनाथन इडुआर्डाे कान्टिलाना जोरिल्ला पहिलोपटक नेपाली फुटबलमा देखिएका हुन् । चिलीमा हुर्किएका उनले सुरुमा प्यालेस्टाइनबाट खेले । ३२ वर्षीय खेलाडीले आफ्नो प्रभाव पहिलो खेलमै काठमाडौंविरुद्ध देखाउन सफल भए । उनले खेलको पाँचौं मिनेटमै गोल गरे । शारीरिक रूपमा बलिया जोनाथनले पोखराविरुद्ध ३–२ को रोमाञ्चक जितमा पनि दुई गोल गरेका थिए । तर, त्यसपछिका अधिकांश खेलमा विश्राम लिएका उनले फाइनलमा भने केही समय खेले । 

 स्टेफन विनोङ समीर (पोखरा थन्डर्स), गोल : ३ 
यसपटक पोखरा थन्डर्सले सरप्राइज नतिजा नै निकाल्यो । सुरुमा दुई खेलमा पराजित भएको टोलीले त्यसपछिका खेलमा अपराजित यात्रा कायम राख्दै फाइनल खेल्यो । सुमन श्रेष्ठको प्रशिक्षणमा रहेको पोखराका लागि २७ वर्षीय स्टेफनको प्रदर्शन अब्बल रह्यो । उनले काठमाडौंविरुद्ध जित्नैपर्ने खेलमा निर्णायक एक गोल गरे । झापा र धनगढीविरुद्ध पनि उनको नाममा समान एक गोल रह्यो । क्यामरुनका बिनोङसँग आधा दशकदेखि नेपाली फुटबलमा खेलेको अनुभव थियो । दशरथ रंगशालामा उनले यसको भरपूर सदुपयोग गरे । 

 इमोह इजेकिइल (ललितपुर सिटी), गोल : ३
ललितपुरका कान्टिलानासँगै इमोह इजेकिइलले पनि समान तीन गोल गरेका छन् । उनले उपाधि भिडन्तमा पोखराविरुद्ध एक गोल गर्न सफल रहे । उनकै गोलमा ललितपुरले अग्रता बनाएको थियो । त्यसअघि धनगढी र चितवनका लागि उनले समान एक गोल गरेका थिए । इमोहले लगातार दोस्रोपटक ललितपुरलाई च्याम्पियन बनाउन भूमिका खेलेका थिए । पहिलोपटक एनएसएल खेल्न आउँदा उनले सर्वाधिक ६ गोल गरेका थिए । नाइजेरियन इमोहले धनगढी र काठमाडौंविरुद्ध समान दुई तथा वीरगन्ज युनाइटेड र पोखराका लागि समान एक गोल गरेका थिए । यसपटक पनि उनको प्रदर्शन निकै राम्रो देखिएको थियो । 

 जोई आइडु (पोखरा थन्डर्स), गोल : ३
पोखराले अन्तिम समयमा मात्र जोई आइडुलाई सम्झौता गरेको थियो । पोखराले उनलाई किन भित्र्याएको भनी प्रमाणित पनि गरेको छ । शारीरिक रूपमा निकै बलिया आइडुले टोलीलाई आवश्यकताअनुसार डिफेन्समा सहयोग गर्ने र काउन्टर अट्याकमा पनि उत्तिकै प्रभावशाली प्रदर्शन गर्न सफल भए । विशेषतः उनको प्रदर्शन दोस्रो क्वालिफायर्समा चितवनविरुद्ध रह्यो । टोलीलाई जित्नैपर्ने दबाबबीच दुई गोल गरेका थिए । त्यस्तै, ललितपुरविरुद्ध पहिलो भेटमा ३–२ ले पराजित हुँदा एक गोल उनको नाममा थियो । आइडुकै उत्कृष्ट प्रदर्शनमा पोखराले पहिलोपटक फाइनलमा स्थान बनाएको थियो ।