लामो समयदेखि रिक्त रहेको लोकतान्त्रिक समाजवादी पार्टी (लोसपा)को मधेश प्रदेश संसदीय दलको नेतामा प्रदेश सभा सदस्य जयनुल राइन चयन भएका छन् । करिब १५ महिनादेखि रिक्त रहेको पदमा लोसपाको केन्द्रीय कार्यालयले सोमबार दलको नेतामा राइनलाई चयन गरेको हो ।
प्रदेश सभा सदस्य तथा दलका नेता अभिराम शर्मा थमन विकको हत्यामा दोषी ठहर भएपछि लोसपा संसदीय दलको नेताको पद खाली भएको थियो । शर्मालाई अदालतले दोषी ठहर गरेपछि मधेश प्रदेश सभाले उनलाई निलम्बन गरेको थियो ।
लामो रस्साकस्सीपछि केन्द्रीय अध्यक्ष महन्थ ठाकुरले औपचारिक रूपमा पत्र लेखेर सांसद राइनलाई जिम्मेवारी दिएका हुन् । नेता राइनले आफूलाई पार्टी अध्यक्षले जिम्मेवारी दिएको बताए । उनले भने, ‘करिब १५ महिनादेखि यो पद खाली थियो, पार्टी अध्यक्षज्यूले मलाई जिम्मेवारी दिनुभएको छ । त्यहीअनुसार मैले सभामुखको कार्यालयलाई जानकारी गराएको छु ।’ अर्को व्यवस्था नहुँदासम्म राइनलाई संसदीय दलको नेता मनोनयन गरिएको हाे ।
