नेकपा (माओवादी केन्द्र)का अध्यक्ष पुष्पकमल दाहाल प्रचण्डले संक्रमणकालीन न्याय पीडितकेन्द्रित हुनुपर्नेमा राजनीतिक नेतृत्व एकमत रहेको बताएका छन्।
बिहीबार संक्रमणकालीन न्यायसँग सम्बन्धित राष्ट्रिय सम्मेलनलाई सम्बोधन गर्दै प्रचण्डले यस्तो बताएका हुन्। ‘टिआरसी र ट्रान्जिसनल जस्टिससँग सम्बन्धित कुरा मुख्यतः भिक्टिम सेन्टर्ड (पीडितकेन्द्रित) हुनुपर्छ। पीडितहरूलाई सम्बोधन गर्ने कुरालाई उच्च प्राथमिकतामा राख्नुपर्छ भन्ने कुरामा पनि राजनीतिक नेतृत्व तहमा कहिल्यै पनि विवाद भएन,’ उनले भने।
राजनीतिक उतारचढाब र कानुनी विषयले संक्रमणकालीन न्यायमा ढिलाइ भएको स्विकार्दै पूर्वप्रधानमन्त्रीसमेत रहेका प्रचण्डले सैद्धान्तिक रूपमा नेतृत्व तहमा टिआरसीमा कुनै विवाद नरहेको बताए।
उनले भने, ‘तमाम विवाद र विमतिबिच पनि शान्ति प्रक्रिया टुंग्याउनुपर्छ भन्ने कुरामा इन प्रिन्सिपल (सैद्धान्तिक रूपमा) हामी कहिल्यै पनि विवादमा भएनौँ। कहिले प्राविधिक, कहिले कानुनी र कहिले राजनीतिक उतारचढाव देशमा जो हुन्छन्, त्यसको कारणले डिले (ढिलाइ) त भयो । तर, योसँग सम्बन्धित प्रिन्सिपलमा विवाद भएको हुनाले डिले भएको भन्न मिल्दैन।’
