दाङको लमहीमा जारी प्रधानमन्त्री कप एकदिवसीय पुरुष क्रिकेट प्रतियोगितामा विभागीय टोली नेपाल पुलिस क्लबले कर्णाली प्रदेश टिमलाई १४८ रनको लक्ष्य दिएको छ ।
लमहीस्थित देउखुरी अन्तर्राष्ट्रिय क्रिकेट रंगशालामा टस हारेर ब्याटिङको निम्तो पाएको पुलिस क्लबले ४८ ओभरमा सबै विकेट गुमाउँदै १४७ रन बनायो । पुलिसका लागि अर्जुन साउदले सर्वाधिक ३६ रन जोडे । उनले ६० बल खेल्दै चार चौका र एक छक्का हाने । यस्तै, दिलीप नाथले ५९ बलमा दुई चौकासहित ३४ रन बनाए।
यसैगरी, पुलिसका लागि सागर ढकालले अविजित २२ रन, अमित श्रेष्ठ सात, गुल्सन झाले आठ, ललितनारायण राजवंशीले सात, करण केसीले ६ तथा श्रवण यादवले ११ रन बनाए । बलिङतर्फ कर्णालीका लागि अर्जुन चनाराले चार, कप्तान दिवान पुनले तीन तथा दिनेश अधिकारी, दीपेन्द्र रावत र सुनील धमलाले एक–एक विकेट लिए ।
दाङमा पहिलोपटक आयोजना भएको प्रधानमन्त्री कप एकदिवसीय पुरुष क्रिकेट प्रतियोगितामा अपराजित रहँदै पुलिस क्लब अंक–तालिकाको शीर्ष स्थानमा रहेको छ। कर्णाली प्रदेश पाँचौँ स्थानमा छ ।
