तारकेश्वर नगरपालिकाको आइतबार बसेको नगरसभाको १६औँ अधिवेशनबाट आउँदो वैशाखदेखि लागू हुने गरी तारकेश्वरका स्थायी बासिन्दाहरूका लागि सुत्केरी, ज्येष्ठ नागरिक सहारा र मृत्यु संस्कार भत्ता नगरपालिकाले दिने घोषणा गरेको नगर प्रमुख कृष्णहरि महर्जनले बताए ।
नगरपालिकाभित्र स्थायी रूपमा बसोबास गर्ने नागरिकहरूका लागि यही २०८२ साल वैशाख महिनाबाट लागू हुने गरी कोखदेखि शोक कार्यक्रमअन्तर्गत कोख, ज्येष्ठता सहायता र शोक कार्यक्रमको नीति सार्वजनिक गरेको छ ।
कोख कार्यक्रमअन्तर्गत बच्चा जन्माउनेहरूका लागि एकपटकमा पाँच हजार नगद नगरपालिकाले उपलब्ध गराउने भएको छ । सो कार्यक्रमअन्तर्गत नगरपालिकाभित्र स्थायी बसोबास भई जन्म भएका कुनै पनि बालबालिकाहरूको परिवारले उक्त रकम प्राप्त गर्ने नगरपालिकाका कार्यकारी अधिकृत ईश्वरीप्रसाद आचार्यले बताए । त्यस्तै, जेष्ठता नागरिक सहायता कार्यक्रमअन्तर्गत नगरपालिकाभित्र स्थायी बसोबास गर्ने ८० वर्षमाथिका वृद्ध–वृद्धालाई सम्मान तथा सहारास्वरूप प्रतिव्यक्ति रु. दुई हजार नगद नगरपालिकाले उपलब्ध गराउने भएको छ ।
शोक कार्यक्रमअन्तर्गत नगरपालिकाभित्र स्थायी बसोबास गरेका कुनै पनि परिवारका सदस्यहरूको निधन हुन पुगेमा दाहसंस्कार वा काजकिरिया खर्चबापत प्रतिव्यक्ति १० हजार उपलब्ध गराउने भएको छ ।
सुत्केरी भत्ता र मृत्यु हुने परिवारलाई दाहसंस्कारबापतको खर्च अन्य पालिकाहरूले पनि यसभन्दा अघि दिए पनि ज्येष्ठ नागरिक सहायता खर्च अरूले दिएको देखिँदैन ।
