‘ए’ डिभिजन लिग च्याम्पियन चर्च ब्वाइज युनाइटेड झापा एफसीलाई सेडन डेथमा ५–४ ले हराउँदै मेचीनगर गोल्डकप फुटबल प्रतियोगिताको सेमिफाइनलमा प्रवेश गरेको छ । मेचीनगरस्थित काँकडभिट्टा खेलमैदानमा आइतबार निर्धारित समय र पेनाल्टीसमेत बराबरी हुँदा विजेता टोलीको छिनोफानो सडन डेथबाट भएको हो । पहिलो हाफ गोलरहित बराबरीमा समाप्त भयो । दोस्रो हाफमा दुवै टोलीले १–१ को बराबरी खेले । त्यसपछि खेल सीधै पेनाल्टी सुटआउटमा गयो ।
पेनाल्टीमा चर्च ब्वाइजका गोलरक्षक टिकेन्द्र थापामगर नायक बने । प्लेयर अफ दी म्याच उनले झापाका धीरेन्द्र विष्टको प्रहार रोकेका थिए । नेपाल सुपर लिग (एनएसएल) टोली झापाका अभिषेकको प्रहार बाहिरिएको थियो । झापाका रोशन पहारी, प्रवित बस्नेत, बाफोर र गौरव धिमालले गोल गरेका थिए । चर्च ब्वाइजका लागि राजेश परियार, जया गुरुङ, कुमार गुरुङ, विदेशी खेलाडी अबयुमी फाकुन्ले र टिकेन्द्रले गोल गरेका थिए । सुरजजिउ ठकुरीको प्रहार भने झापाका गोलरक्षक कृशल मोक्तानले बचाएका थिए । अब चर्च ब्वाइजले फाइनल प्रवेशका लागि एपिएफ र मच्छिन्द्र फुटबल क्लबबिचको विजेतासँग २९ फागुनमा खेल्नेछ । सोमबार उज्वेकिस्तानको ब्ल्याक बुल्सले धरान एफसीको सामना गर्नेछ । यो खेलको विजेताले सेमिफाइनलमा आयोजक काँकडभिट्टासँग खेल्नेछ ।
पहिलो हाफ बराबरी
मेचीनगर मैदानमा पहिलो हाफ गोलरहित बराबरीमा सकिएको थियो । मध्यान्तरमा दुवै पक्ष थप आक्रामक भए । चर्च ब्वाइजले ६९औँ मिनेटमा १–० को अग्रता लियो । चर्च ब्वाइजलाई रिचार्ड विल्सनले अग्रता दिलाएका हुन् । झापाका रक्षक सर्ज डिकाले गरेको गल्तीको फाइदा उठाउँदै रिचार्डले गोल गरेका हुन् । त्यसअघि अबोयुमी फाकुन्लेले गरेको क्रस डिकाले क्लियर गर्न नसक्दा रिचार्डले बक्सभित्र बल नियन्त्रणमा राख्दै गोल गरेका थिए । खेल सकिन एक मिनेटअघि झापा एफसीले बराबरी गोल फर्कायो । झापाका श्याम मुर्मूले गोल गरेका हुन् । बक्सभित्र हुलमुलमा मुर्मूले गोल गरेका हुन् । यसअघि मुर्मू आर्यन राईको स्थानमा मैदान प्रवेश गरेका थिए ।
