कान्ति बाल अस्पताललाई हजार शय्यामा विस्तार गर्ने कार्यमा सहयोगका लागि स्वास्थ्य तथा जनसंख्यामन्त्री प्रदीप पौडेलले आग्रह गरेका छन्। नेपालका लागि जापानी राजदूत तोरु मायदासँगको हालै भएको भेटमा मन्त्री पौडेलले बालबालिकाको उपचारका लागि विशिष्टीकृत अस्पताल भए पनि पर्याप्त पूर्वाधार नभएकाले सरकारको योजनामा साथ दिन जापान सरकारसँग आग्रह गरेका हुन्।
भेटका क्रममा मन्त्री पौडेलले मन्त्रालयले घोषणा गरेको एक्स रे फिल्म प्रयोग निरुत्साहित गरेर डिजिटल वितरण योजनामा समेत जापान सरकारबाट साथ अपेक्षा गरेको बताएका थिए।
त्यस क्रममा राजदूत मायदाले अस्पताललाई सघाउन सकारात्मक रहेको बताए। राजदूत मायदाले जापान र नेपालबिच लामो सहयोग सहकार्य रहेको भन्दै मन्त्रालयको अनुरोधमा सकारात्मक रहेको बताएको मन्त्री पौडेलको सचिवालयले जनाएको छ।
मन्त्री पौडेलले कान्ति बाल अस्पतालको क्षमता विस्तार गरेर बढी क्षमतामा प्रभावकारी बाल उपचार उपलब्ध गराउने योजना सार्वजनिक गरेका थिए। त्यसलाई सफल पार्न विभिन्न क्षेत्रसँग सहकार्य र संवाद भैरहेको छ। यसै क्रममा जापान सरकारसँग सहकार्यको विकल्पबारे खोजी भएको मन्त्री पौडेलको सचिवालयले उल्लेख गरेको छ।
