सुरक्षा चिन्ताका कारण निषेधित देश भएको केही वर्षपछि एउटा ऐतिहासिक कदमका रूपमा स्वागत गरिएको पाकिस्तानले बुधबारदेखि करिब तीन दशकमा पहिलो प्रमुख क्रिकेट प्रतियोगिता आयोजना गर्दै छ।
अधिकारीहरूले यसलाई सहज र सुरक्षित रूपमा निकाल्न सकेको खण्डमा आगामी साढे दुई हप्तामा तीनवटा सहरमा च्याम्पियन्स ट्रफी आयोजना गर्दा दक्षिण एसियाली राष्ट्रको प्रतिष्ठामा ठुलो बढोत्तरी हुनेछ।
‘पाकिस्तान एक सुरक्षित देश हो र यो प्रशासनको दृष्टिकोणबाट यस्तो विश्वव्यापी प्रतियोगिता गर्न सक्षम छ भनेर विश्वलाई विश्वास दिलाउन गम्भीर मिहिनेत र विश्वास दिलाउन आवश्यक थियो,’ पाकिस्तान क्रिकेट बोर्ड (पिसिबी)का पूर्वअध्यक्ष रमिज राजाले भने, ‘विश्वले अन्ततः हाम्रो दृष्टिकोण बुझ्यो।’
लामो समयदेखि चलिरहेको राजनीतिक तनावका कारण छिमेकी र कट्टर प्रतिद्वन्द्वी भारतले पाकिस्तानमा खेल्न अस्वीकार गरेपछि यो तयारी कुनै समस्याविना भने भएको होइन। मैदानभित्र र बाहिर शक्तिशाली राष्ट्र भारतका खेलहरू भने दुबईमा हुनेछन्। तर, अन्य सात देश पाकिस्तानमा आधारित हुनेछन्। प्रमुख सहरहरूमा आक्रमणहरू विरलै हुने गरेको भए पनि विशेष गरी आयोजक सहरहरू कराँची, लाहोर र रावलपिन्डीमा पाकिस्तानले सुरक्षा बढाएको छ।
पाकिस्तानले सन् २००८ मा विश्वकपपछि प्रमुख एकदिवसीय प्रतियोगिता च्याम्पियन्स ट्रफी आयोजना गर्ने भएको थियो। सेप्टेम्बर ११ को आक्रमणपछि छिमेकी अफगानिस्तानको युद्धबाट फैलिएको सुरक्षा संकटका कारण त्यसको सट्टा एक वर्षपछि दक्षिण अफ्रिकामा आयोजना गरिएको थियो।
इस्लामवादी बन्दुकधारीहरूले लाहोरमा श्रीलंकाको टोली बोकेको बसमा आक्रमण गरेपछि धेरै खेलाडी घाइते भएका थिए र आठजना प्रहरी र सर्वसाधारणको मृत्यु भएपछि सन् २००९ मा पाकिस्तान अन्तर्राष्ट्रिय पक्षहरूका लागि निषेधित क्षेत्र बन्यो।
तर, सन् २०१४ मा सुरु भएको र केही वर्षसम्म चलेको व्यापक सैन्य कारबाहीपछि सुरक्षामा व्यापक रूपमा सुधार भएको छ। सन् २०१९ मा टेस्ट क्रिकेट पाकिस्तानमा फर्कियो। त्यसपछि अस्ट्रेलिया, इंग्ल्यान्ड, न्युजिल्यान्ड र दक्षिण अफ्रिकाले यहाँको भ्रमण गरे र यसले पाकिस्तानको प्रतियोगिता आयोजना गर्ने प्रयासलाई सहयोग पुर्यायो। ती सबै टोली च्याम्पियन्स ट्रफीका लागि पाकिस्तानमा हुनेछन् ।
‘आतंकवादले सबै कुरा लियो’
७७ वर्षीय व्यवसायी हाजी अब्दुल रज्जाकका लागि विश्वव्यापी प्रतियोगिता पाकिस्तानमा फर्कनु अर्को जन्मदिनजस्तै हो। पाकिस्तानले अन्तिमपटक सन् १९९६ मा भारत र श्रीलंकासँग सहआयोजकका रूपमा प्रमुख अन्तर्राष्ट्रिय क्रिकेट प्रतियोगिता आयोजना गरेको थियो।
श्रीलंकाले अस्ट्रेलियालाई हराएर उपाधि जितेको वेला रज्जाकले सन् १९९६ मार्च १७ मा लाहोरको गद्दाफी स्टेडियममा श्रीलंकाको झन्डा फहराएका थिए। २९ वर्षपछि क्रिकेटप्रेमी रज्जाकले बुधबार कराँचीमा च्याम्पियन्स ट्रफीको उद्घाटन खेलमा विजेता पाकिस्तान र न्युजिल्यान्डबिच हुने खेल हेर्नेछन्।
‘यो मेरो दिमागमा ताजा छ, मेरो देश त्यसवेला फस्टाउँदै थियो र क्रिकेट सबैको मनमा थियो,’ आँखा रसाएका रज्जाकले भने, ‘आतंकवादले हामीबाट सबै कुरा लियो । म एक विश्वव्यापी प्रतियोगिता हाम्रो देशमा फर्किएको देख्दा अति खुसी छु र यो मेरो जन्मदिन हुनेजस्तो महसुस गरिरहेको छ।’
आतंकवाद अझै पनि पाकिस्तानमा खतरा भए पनि हिंसा स्टेडियमहरूबाट धेरै टाढा उत्तरदेखि दक्षिणसम्म दुर्गम सीमावर्ती क्षेत्रहरूमा लगभग पूर्ण रूपमा सीमित छ। राजधानी इस्लामाबादलाई लकडाउनमा राखी पाकिस्तानले हालै सांघाई सहयोग संगठनको शिखर सम्मेलन र बालिकाहरूको शिक्षामा विश्वव्यापी बैठक आयोजना गरेको छ। यसले अन्तर्राष्ट्रिय मञ्चमा पाकिस्तानले आफ्नो प्रोफाइल बढाएको छ।
आफ्नो तयारीको परीक्षणका रूपमा पाकिस्तानले गत हप्ता न्युजिल्यान्ड र दक्षिण अफ्रिकासँग त्रिदेशीय शृंखला आयोजना गर्यो। लाहोर र कराँचीमा भर्खरै नवीकरण गरिएको स्टेडियमहरूमा दर्शकहरू भेला भएका थिए।
सन् १९८७ मा पाकिस्तान र भारतले आयोजना गरेको विश्वकपमा खेलेका पाकिस्तानका पूर्वकप्तान राजाले च्याम्पियन्स ट्रफीको आयोजना खेलभन्दा बाहिर धेरै महत्त्वपूर्ण रहेको बताए। ‘यो च्याम्पियन्स ट्रफी विश्व क्रिकेट समुदायमा आफ्नो स्थानलाई सामान्य बनाउने तर्फको महत्त्वपूर्ण कदम हो,’ उनले भने, ‘यो राष्ट्रिय गौरव, लचिलोपन र दृढताबारे बलियो सन्देश पठाउने कुरा पनि हो, यो युवा संलग्नता, सांस्कृतिक प्रवर्द्धन र विश्वव्यापी छवि निर्माण गर्नेबारे हो, अब प्रस्तुत गर्ने जिम्मेवारी हामीमाथि छ।’
