भ्रष्टाचार मुद्दामा दोषी ठहर कांग्रेस सर्लाही सभापति सुरेन्द्रप्रसाद सिंहलाई जिम्मेवारीबाट हटाउन माग गर्दै पार्टी कार्यालय सानेपामा सुरु भएको धर्ना दोस्रो दिन पनि निरन्तरता पाएको छ । पटक–पटक नेतृत्वलाई ध्यानाकर्षण गराँउदा पनि बेवास्ता गरेपछि सर्लाही कांग्रेसले केन्द्रीय कार्यालय सानेपामा धर्ना थालेको हो ।
धर्नामा सहभागी कांग्रेस सर्लाही उपसभापति नवीन अधिकारीले दोस्रो दिनमा पनि मागका विषयमा नेतृत्व तहबाट कुनै प्रतिक्रिया नआएको बताए । आइतबार भने महामन्त्री विश्वप्रकाश शर्माले टेलिफोन सम्पर्क गरेर मागप्रति गम्भीर रहेको र पूरा गर्ने प्रतिबद्धता जनाएको बताएका थिए । त्यसबाहेक माग पूरा गर्न ठोस छलफल र प्रस्ताव आएका छैनन् । पार्टी नेतृत्वसमक्ष पटक–पटक सिंहलाई विधानअनुसार जिम्मेवारीबाट हटाउन माग गरे पनि निरन्तर बेवास्ता गरेपछि बाध्य भएर धर्नामा थाल्नुपरेको उनको भनाइ छ । यसपटक भने माग पूरा नभएसम्म धर्ना निरन्तर रहने उनीहरूको भनाइ छ । ‘हामीले धेरैपटक पार्टी नेतृत्वलाई विधानको व्यवस्थाअनुसार जिम्मेवारीबाट हटाउन आग्रह ग¥यौँ । तर, नेतृत्वले यता आश्वासन दिने र उता संरक्षण गर्ने ग¥यो । नेतृत्वलाई हामी बाध्य भएर धर्ना सुरु गरेका छौँ,’ उनले नयाँ पत्रिकासँग भने, ‘आइतबार महामन्त्री विश्वप्रकाश शर्माले टेलिफोन सम्पर्क गरेर । माग पूरा गर्न प्रतिबद्ध छौँ भन्नुभएको थियो । त्यसबाहेक नेतृत्वले हाम्रा मागका विषयमा कुनै छलफल गरेको छैन ।’
कांग्रेस प्रचार विभाग प्रमुख मीन विश्वकर्माले मागलाई पार्टीले गम्भीर रूपमा लिएको बताए । धर्नारत समूहलाई पार्टी बैठकबाट निर्णय हुने भन्दै धर्ना रोक्न आग्रह गरेको जिकिर गरे । तर, उनीहरू धर्ना रोक्न तयार नदेखिएको र यसबारे पार्टीमा छलफल भइरहेकोे बताए । ‘पार्टीले उहाँहरूको मागलाई सिरियसली लिएको छ । कांग्रेसका नेतृत्वको आदेशका भरमा कारबाही गर्ने या सम्मान गर्ने प्रचलन छैन । यसलाई पार्टीको केन्द्रीय कार्यसमिति बैठक वा कार्यसम्पादन बैठकबाट टुंगो लगाउनुपर्छ । अहिले पार्टीको बैठक बसेको छैन । बैठक बसेपछि निर्णय हुन्छ । उहाँहरूलाई हामीले घर जानुस् बैठकबाट निर्णय हुन्छ भनेका छौँ,’ उनले भने ।
यसअघि २४ पुसमा सानेपामा धर्ना थालिएको थियो । अनुशासन समिति संयोजक आनन्द ढुंगाना, समिति सदस्य सञ्जय गौतम, मुख्यसचिव कृष्णप्रसाद पौडेलले पार्टीको आन्तरिक विषय भएकाले पार्टी नेतृत्वसँग छलफल गरेर २८ पुसभित्र माग पूरा गर्ने बताएपछि धर्ना रोकिएको थियो । ‘यसअघि हामीले माग पूरा होला भनेर गर्ने पार्टी केन्द्रीय अनुशासन समिति संयोजक, मुख्यसचिवलगायतले आग्रह गरेपछि धर्ना स्थगित ग¥यौँ, तर मागमाथि कुनै सुनुवाइ भएन । यसपटक भने माग पूरा नभएसम्म घर फर्कँदैनौँ,’ उनले भने ।
सिंहलाई कारबाहीका लागि ११ महिने अवधिमा कांग्रेस सर्लाहीले केन्द्रीय कार्यालयमा दुईपटक औपचारिकपत्र पठाएको थियो । सभापति शेरबहादुर देउवानिकट मानिने कांग्रेस सर्लाही सभापति सिंह वन मासेर भ्रष्टाचार गरेको मुद्दामा सर्वोच्च अदालतबाट समेत सजाय पाएपछि पनि जिल्ला सभापतिकै हैसियतमा सक्रिय छन् ।
