कांग्रेस–एमाले गठबन्धनबाट मधेशको समस्या समाधान नहुने कार्यदल बैठकको निष्कर्ष, एजेन्डामा सहकार्य गर्ने सहमति
संविधान संशोधनलगायतका मुद्दामा साझा धारणा बनाउने प्रयासस्वरूप कार्यगत एकताको प्रयास थालेका तराई–मधेशकेन्द्रित राजनीतिक दलहरूबिच संवादको सुरुवात भएको छ । यद्यपि, जनता प्रगतिशील पार्टीका अध्यक्ष एवं पूर्वमन्त्री हृदयेश त्रिपाठीको संयोजनमा राजधानीमा मंगलबार भएको बैठकमा जसपा नेपाल, आम जनता पार्टी र नागरिक उन्मुक्ति पार्टी सहभागी भएनन् ।
मंगलबारको बैठकमा जनमत, जसपा, लोसपा, राष्ट्रिय मुक्ति र तमलोपाका नेता तथा स्वतन्त्र सांसद अमरेशकुमार सिंहले एजेन्डामा सहकार्य गरेर जाने प्रतिबद्धता जनाएका छन् । सत्तागठबन्धनले संविधान संशोधनका लागि गृहकार्य थालेपछि संविधानका कैयौँ मुद्दामा असन्तुष्ट तराई–मधेशकेन्द्रित दलहरू साझा धारणा बनाउने प्रयासमा जुटेका हुन् ।
मंगलबार बैठक सकारात्मक भएको र अर्को बैठकमा मुद्दालाई बुँदागत रूपमा उतार्ने सहमति बनेको नेताहरूको दाबी छ । त्रिपाठीले मुख्यतः भ्रष्टाचार, अर्थतन्त्र र विभेदको विषय उठाइने बताए । ‘लुज फोरम बनाएर सहकार्य गर्दै जाने विषयमा प्रारम्भिक संवाद भयो । सबैको प्रतिबद्धता आएको छ । सहकार्य गर्ने बुँदाबारे आगामी बैठकमा छलफल हुन्छ,’ त्रिपाठीले भने, आजको बैठकले उत्साह थपेको छ । अर्को बैठकअघि साझा एजेन्डा के हुन सक्छ भनेर दलहरूले आ–आफ्नो पार्टीमा छलफल गर्ने छन् । सबै दलले एजेन्डा तय गरेपछि फेरि बैठक बस्नेछ । जहाँ मुद्दा बुँदागत रूपमा उतार्ने काम हुनेछ ।’
मंगलबार बैठकमा जसपाका रेणु यादव र मोहम्मद इस्तियाक राई, लोसपाबाट जितेन्द्र सोनल र डा. सुरेन्द्र झा, जनमतबाट शरद यादव, जनता प्रगतिशीलबाट त्रिपाठी र शिवजी यादव, राष्ट्रिय मुक्ति पार्टीबाट केशव झा, तमलोपाबाट वृषेशचन्द लाललगायतका नेता सहभागी थिए ।
मधेशको समस्या समाधान कांग्रेस–एमालेले गर्न नसक्ने निष्कर्ष उनीहरूको छ । मधेशकेन्द्रित पार्टीहरूले नै मधेशको समस्या समाधान गर्न सक्ने र त्यसका लागि सहकार्य गर्दै अघि बढ्नुपर्नेमा नेताहरूले जोड दिएका छन् । संविधान संशोधन भने तत्काल नहुने निष्कर्ष उनीहरूको छ । ‘कांग्रेस–एमालेले संविधान संशोधनको कार्ड अहिले खोल्दैनन्, राष्ट्रिय सभाको निर्वाचन नभएसम्म संशोधनको विषय अघि बढ्दैन । उनीहरू सरकार बनाउन मिलेका हुन्, देखाउन सात बुँदामा संविधान संशोधनको विषय राखेका मात्र हुन्,’ त्रिपाठीले भने ।
समसामयिक राजनीतिको विषयमा छलफल भएको जसपा उपाध्यक्ष रेणु यादवले बताइन् । ‘समसामयिक विषयमा छलफल भयो । अहिले नै निष्कर्षमा पुगिएको छैन, हामी फेरि बस्छौँ,’ उनले भनिन् । लोसपा महासचिव सुरेन्द्र झाले संवाद र सहकार्यका लागि छलफल भएको बताए । ‘संवाद र सहकार्यका लागि गम्भीर छलफल भयो । थप छलफल गर्दै अघि बढ्छौँ,’ उनले भने ।
राष्ट्रिय मुक्ति पार्टीबाट नेता केशव झाले संवादहीनताको अन्त्य भएको र अब निरन्तर संवाद हुने बताए । ‘अर्को बैठकअघि आ–आफ्ना पार्टीमा साझा एजेन्डा के–के हुन्छ भनेर छलफल गरेर विषय तय गर्छौँ । कुनै न कुनै रूपमा एकत्रित हुने वातावरण बन्दै छ,’ राष्ट्रिय मुक्ति पार्टीका नेता झाले भने ।
