नेपालको हेल्प नेपाल स्पोर्टस् क्लबले लगातार तेस्रो जित निकाल्दै सेन्ट्रल एसियन भलिबल एसोसिएसन (काभा) पुरुष क्लब भलिबल च्याम्पियनसिपको सेमिफाइनल स्थान सुरक्षित गरेको छ ।
राष्ट्रिय खेलकुद परिषद् (राखेप)को कभर्डहलमा बुधबार हेल्प नेपालले माल्दिभ्सको क्लब एचडिसीलाई ३–१ को सेटमा हराउँदै अन्तिम चारको स्थान पक्का गरेको हो । हेल्प नेपालले तीन खेलबाट ८ अंक जोडेको छ । हेल्प नेपालले भारतको क्यालिकट हिरोजलाई ३–२ तथा गण्डकी प्रदेशलाई ३–१ को सेटमा हराएको थियो ।
लगातार तेस्रो खेलमा हार व्यहोरेको एचडिसीले चार खेलबाट ३ अंक बनाएको छ । एचडिसीले यसअघि गण्डकीलाई ३–२ को सेटमा पराजित गरेको थियो । एचडिसीले इरानको यू–१८ टोलीसँग ३–२ र क्यालिकटसँग ३–० ले पराजित भएको थियो । एचडिसीविरुद्ध पहिलो सेट २५–२२ ले आफ्नो पक्षमा पारेको हेल्प नेपालले दोस्रो सेट २४–२६ ले गुमाएको थियो । त्यसपछिका दुई सेट २५–१९, २५ –२१ ले आफ्नो पक्षमा पार्दै हेल्प नेपालले अपराजित यात्रा जारी राखेको हो ।
हेल्प नेपाल र माल्दिभ्सको क्लबबिच दोस्रो सेटमा कडा प्रतिस्पर्धा भएको थियो । दोस्रो सेटको अन्तिम समयमा सामान्य गल्ती गर्दा हेल्प नेपाल २४–२६ ले पछि पर्यो । दुई सेटको समाप्तिमा खेल १–१ को बराबरीमा रह्यो । तेस्रो सेटमा उत्कृष्ट कमब्याक गर्दै हेल्प नेपालले २५–१९ ले जित्यो ।
उत्कृष्ट लयलाई निरन्तरता दिँदै हेल्प नेपालले चौथो सेट २५–२१ ले हात पार्यो । दिनको पहिलो खेलमा इरानले क्यालिकटलाई ३–० को सेटमा हराउँदै सेमिफाइनल यात्रा तय गरेको थियो । बिहीबार हेल्प नेपालले इरान तथा गण्डकीले क्यालिकटको सामना गर्नेछन् ।
