मुसिकोट नगरपालिकामा सञ्चालन भएको सातौँ नगरस्तरीय राष्ट्रपति रनिङ सिल्ड प्रतियोगितामा त्रिभुवन मावि कुर्घाले राष्ट्रपति ‘रनिङ सिल्ड’ जितेको छ। त्रिभुवनले २६ स्वर्ण, १६ रजत र ११ कांस्यसहित ५६ पदक प्राप्त गर्दै प्रथम भएको हो।
प्रथम स्थान प्राप्त गर्ने विद्यालयले रनिङ सिल्ड, ट्रफी, प्रमाणपत्र र नगद १६ हजार प्राप्त गरेको छ। त्यस्तै, महेन्द्र आदर्श माविले १९ स्वर्ण, २२ रजत र चार कांस्य गरेर ४५ पदकसहित द्वितीय भएको छ। विद्यालयले ट्रफी, प्रमाणपत्र र नगद १२ हजार प्राप्त गरेको मुसिकोट नगर खेलकुद विकास समितिका अध्यक्ष सन्दीप क्षेत्रीले जानकारी दिए।
पृथ्वी माविले ६ स्वर्ण, पाँच रजत र १ कांस्यसहित १२ पदक प्राप्त गर्दै तृतीय भएको छ। त्यस्तै, उत्कृष्ट खेलाडीहरूलाई समेत ट्रफी, मेडल र प्रमाणपत्र प्रदान गरिएको थियो। उत्कृष्ट विद्यालय र खेलाडीहरूलाई नगरप्रमुख जीवन खरेलले पुरस्कार तथा सम्मान गरेका थिए। राष्ट्रपति रनिङ सिल्ड प्रतियोगितामा नगरभित्रका १६ विद्यालयले विधागत खेलमा र १८ विद्यालयले मार्चपासमा सहभागिता रहेको थियो।
