२९ जेठमा विश्वकप छनोट खेलेको नेपाल आज ताजकिस्तानविरुद्ध मैत्रीपूर्ण खेल खेल्दै
नेपाली राष्ट्रिय फुटबल टोलीले बुधबार ताजकिस्तानसँग मैत्रीपूर्ण खेल खेल्दै छ । त्यसपछि शनिबार नेपालको सामना अफगानिस्तानसँग हुनेछ । यी दुवै खेल फिफाको विन्डो दिनमा हुन लागेको हो । नेपाल पाँच महिनापछि अन्तर्राष्ट्रिय फुटबलमा फर्कन लागेको हो । नेपालले अन्तिमपटक अन्तर्राष्ट्रिय खेल २९ जेठमा खेलेको थियो । फिफा विश्वकप र एएफसी एसियन कपको संयुक्त छनोटअन्तर्गत नेपालले साउदी अरेबियामा यमनले प्रतिस्पर्धा गरेको थियो । यमनविरुद्धको खेलपछि सिनियर पुरुष खेलाडी एकैपटक पाँच महिनापछि मैदानमा उत्रन लागेका हुन् । यसबिचमा अखिल नेपाल फुटबल संघ (एन्फा)ले कुनै अन्तर्राष्ट्रिय मैत्रीपूर्ण खेलका लागि प्रयाससमेत गरेन ।
फिफाको अनुसार विन्डो दिन दुई राष्ट्रबिच अन्तर्राष्ट्रिय मैत्रीपूर्ण खेल आयोजना गराउन सकिन्छ । गत सेप्टेम्बरमा फिफा विन्डो दिन भए पनि एन्फाले यसको सदुपयोग गरेन । एन्फाले ताजकिस्तानमा हुने मैत्रीपूर्ण खेलका लागि खेलाडीलाई दुई महिनाको प्रशिक्षण राखेको थियो । राष्ट्रिय टोलीका प्रमुख प्रशिक्षक भिसेन्जोको सम्झौता नभएपछि एन्फाले पूर्वराष्ट्रिय खेलाडी नवीन न्यौपानेलाई कार्यवाहक प्रशिक्षक बनाएको छ । न्यौपानेको प्रशिक्षणमा खेलाडीले दुई साता प्रशिक्षण गर्दै प्रतिस्पर्धाका लागि तयारी गरेका हुन् । यही दुई साताको तयारीका साथ नेपालले ताजकिस्तान र अफगानिस्तानविरुद्ध खेल्न लागेको हो ।
ताजकिस्तान र अफगानिस्तान वरीयतामा माथि
नेपालभन्दा फिफा वरीयतामा ताजकिस्तान र अफगानिस्तानमाथि छन् । फिफा वरीयतामा नेपाल १७६औँ स्थानमा छ । ताजकिस्तान १०५औँ र अफगानिस्तान १५१औँ स्थानमा छन् । नेपालका कार्यवाहक प्रशिक्षक न्यौपानेले शारीरिक रूपमा बलियो घरेलु टोली ताजकिस्तानविरुद्ध आक्रामक शैलीमा प्रतिस्पर्धा गर्ने बताएका छन् ।
तथ्यांकअनुसार नेपाल र ताजकिस्तानबिच दुईपटक अन्तर्राष्ट्रिय खेल भएका छन् । दुई टोलीबिच यो तेस्रो भेट हो । नेपालले अन्तिमपटक ताजकिस्तानविरुद्ध प्रतिस्पर्धा गरेको सात वर्षअघि हो । सन् २०१७ मा एएफसी एसियन कप छनोटका दुवै लेगमा नेपाल पराजित भएको थियो । नेपाल पहिलो लेगमा २–१ र दोस्रो लेगमा ३–० ले हार्यो ।
बलियो प्रतिस्पर्धी ताजकिस्तान र अफगानिस्तान
नेपालले प्रतिस्पर्धा गर्न लागेका ताजकिस्तान र अफगानिस्तानले युरोपियन बेसमा फुटबल खेलिरहेका छन् । घरेलु संरचना र पूर्ण व्यावसायिक खेलाडीले भरिएको ताजकिस्तानलाई बलियो प्रतिद्वन्द्वीका रूपमा कप्तान किरण चेम्जोङले लिएका छन् । ‘सबै पक्षमा उनीहरू हामीभन्दा बलियो भए पनि मानसिक रूपमा ताजकिस्तानविरुद्ध भिड्न तयार छौँ,’ उनले भने । नेपालले शनिबार अफगानिस्तानविरुद्ध खेल्नेछ । नेपाले अन्तिमपटक अफगानिस्तानसँग सन् २०१३ मा काठमाडौंमा भएको साफ च्याम्पियनसिपको सेमिफाइनलमा प्रतिस्पर्धा गरेको थियो ।
अञ्जनलाई कीर्तिमान रच्न एक गोल आवश्यक
स्ट्राइकर अञ्जन खड्कालाई नेपाली राष्ट्रिय टोलीबाट सर्वाधिक अन्तर्राष्ट्रिय गोलको रेकर्ड राख्ने अवसर मिलेको छ । नेपालबाट अञ्जनसहित पूर्वकप्तान हरि खड्का र नीराजन रायमाझीले सर्वाधिक १३ अन्तर्राष्ट्रिय गोल गरेका छन् । अञ्जनले ताजकिस्तानविरुद्ध गोल गर्दा उनले नेपाली फुटबल इतिहासम एउटा रेकर्ड आफ्नो नाममा राख्नेछन् । चोटका कारण उनले विश्वकप छनोटअन्तर्गत युएई र यमनविरुद्ध खेल गुमाएका थिए ।
