सहकारी ठगी, संगठित अपराध र सम्पत्ति शुद्धीकरणसम्बन्धी मुद्दामा अनुसन्धानका लागि २ कात्तिकदेखि कास्की प्रहरी हिरासतमा रहेका रास्वपा सभापति रवि लामिछानेलाई आज रुपन्देही लगिने भएको छ ।
रुपन्देहीको बुटवलस्थित सुप्रिम बचत तथा ऋण सहकारी संस्थाको रकम गोर्खा मिडियामा लगेर खर्च भएको सम्बन्धमा बयानसँगै अनुसन्धानका लागि लामिछानेलाई रुपन्देही लगिन लागिएको हो ।
बिहान ७ बजेको उडानमार्फत भैरहवा विमानस्थल हुँदै रुपन्देहीको बुटवल लैजाने तयारीसहित प्रहरीले लामिछानेलाई पोखरा विमानस्थल लगेको थियो। बाक्लो कुहिरोेका कारण मौसममा आएको खराबीले गर्दा जहाज उड्न नसक्दा लामिछाने विमानस्थलमै रोकिएका छन् ।
२ कात्तिकदेखि हिरासतमा रहेका लामिछानेलाई आइतबार प्रहरीले १३ दिन म्याद थप गरेसँगै रुपन्देही पठाउन लागेको हो । लामिछानेलाई रुपन्देही पठाइदिन रुपन्देही प्रहरीले कास्की प्रहरीलाई एक साताअघि पत्राचारसमेत गरेको थियो । त्यसअघि ८ कात्तिकमा रुपन्देही जिल्ला अदालतले लामिछानेसँगै १२ जनाविरुद्ध पक्राउ पुर्जीसमेत जारी गरिसकेको छ। सुप्रिमको १४ करोड २९ लाख रुपैयाँ गोर्खा मिडियामा गएको समितिको प्रतिवेदनमा उल्लेख छ ।
गोर्खा मिडिया नेटवर्कका तत्कालीन उपाध्यक्षसमेत रहेका पूर्वडिआइजी छविलाल बन्जाडे जोशीलाई रुपन्देही प्रहरीले सुप्रिमको बचत रकम दुरुपयोगसम्बन्धी बयानका लागि ५ कात्तिकमा रुपन्देही लगेर बयान लिएर ७ गते पोखरा ल्याएको थियो । लामिछानेसँगै जोशी पनि कास्की प्रहरी हिरासतमा छन् ।
