लुम्बिनी प्रदेशमा पछिल्लो चार दिनमा बाढी, पहिरो तथा डुबानबाट एक करोड ४३ लाख रुपैयाँबराबरको क्षति भएको छ । आन्तरिक मामिला तथा कानुन मन्त्रालयले सार्वजनिक गरेको विवरणअनुसार विपतका ३२ वटा घटनामा एक करोड ४३ लाखबराबरको क्षति भएको छ। असोज ११, १२, १३ र १४ गतेको अवधिमा ३२ वटा विपतका घटना घटेका छन् । यो अवधिमा अधिक वर्षा, पहिरो, बाढी तथा डुबानका घटना घटेका हुन् ।
विपतमा परेर तीनजनाको मृत्यु, दुईजना घाइते र एकजना बेपत्ता भएको आन्तरिक मामिला तथा कानुन मन्त्रालयका सूचना अधिकारी गंगाधर पाण्डेले जानकारी दिए । बाढीमा परेर रुपन्देहीमा दुईजना र पानीमा डुबेर बाँके जिल्लामा एकजनाको मृत्यु भएको मन्त्रालयले जनाएको छ ।
यो अवधिमा १९ वटा घर भत्किएका छन् भने १६८ वटा घरमा आंशिक क्षति भएको छ । तीनवटा सरकारी भवनमा आंशिक क्षति पुगेको छ । सातवटा गोठमा पनि क्षति पुगेको जनाइएको छ ।
