बालश्रमशोषणमा मुछिएकी एमालेकी प्रदेश सांसद रेखा शर्मालाई कारबाही नगरिएको विषयमा काठमाडौं महानगरपालिकाका मेयर बालेन शाहले सरकारविरुद्ध निरन्तर प्रहार गरेका छन् । त्यससम्बन्धी आफ्नो स्टाटससमेत हटाइएको भन्दै उनले थप आक्रोश व्यक्त गरेका छन् । उनले मंगलबार लेखेका छन्, ‘पोस्ट उडाउने होइन, दोषी समाऊ सरकार । म गलत हो भने मलाई समाऊ, होइन भने दोषी समाऊ ।’
शर्मालाई पक्राउ नगरिएको विषयमा आइतबार उनले लेखेको फेसबुक पोस्ट धेरै उजुरी आएको भन्दै फेसबुकले हटाइदिएको बालेनको सचिवालयले जनाएको छ । गलत पोस्ट राखेको भन्दै एमालेका नेता तथा कार्यकर्ताले बालेनको आलोचना गर्दै सो पोस्टविरुद्ध फेसबुकलाई उजुरी गरेका थिए ।
प्रदेश सांसद शर्माको तस्बिर राखी उनलाई पक्राउ नगरिएकोमा सो पोस्टमा बालेनले प्रधानमन्त्री ओलीसँग जवाफ मागेका थिए । सोमबार त्यही विषयमा उनले विस्तृत विवरण राखेका थिए भने मंगलबार अर्को पोस्ट राखेर आक्रोश व्यक्त गरेका हुन् । यसरी ओलीविरुद्ध बालेनले निरन्तर प्रहार गरेका थिए । त्यस विषयमा ओलीले केही बोलेका छैनन् भने पार्टीका नेता–कार्यकर्ताले भने आक्रामक रूपमा सामाजिक सञ्जालमार्फत बालेनको आलोचना गरिरहेका छन् ।
काठमाडौं प्रहरीले अनुसन्धानमा ढिलाइ गर्दा यस विषयमा विवाद आएको हो । प्रदेश सांसद शर्माको घरबाट घरेलु कामदारका रूपमा राखिएकी १४ वर्षीया बालिकाको गत १४ जेठमा महानगरपालिकाले उद्धार गरेको थियो । बालिकालाई यातना दिइएको प्रारम्भिक छानबिनमा खुलेपछि महानगरपालिकाले नै जिल्ला प्रहरी परिसर, काठमाडौैंमा जाहेरी दिएको थियो । तीन महिना हुन लाग्दा पनि प्रहरीले अनुसन्धानमा चासो नराखेपछि प्रधानमन्त्रीकै दबाबमा पक्राउ नगरिएको आरोप लगाएका छन् । प्रहरीविरुद्ध सांसद शर्माले उच्च अदालतमा रिट दायर गरेकोमा दाबी नपुग्ने फैसला गरेपछि पनि प्रहरीले अनुसन्धान नगरेको महानगरको दाबी छ ।
