दशौँ राष्ट्रिय खेलकुद तोकिएकै समयमा गर्न पूर्वप्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आग्रह गरेका छन् । शनिबार प्रचण्डले सुर्खेतस्थित कर्णाली प्रदेश रंगशालाको अनुगमन गरेका हुन् ।
मंसिरमा तय गरिएको राष्ट्रिय खेलकुद निर्धारित समयमै हुने नहुने अन्योल बढिरहेका वेला पूर्वप्रधानमन्त्री प्रचण्डले निर्धारित समयमै हुनुपर्ने बताएका हुन् । ‘दशौँ राष्ट्रिय खेलकुद तोकिएकै समयमा सुर्खेतमा हुनैपर्छ । यसमा राजनीति गर्ने भुल सरकारले नगरोस्,’ उनले भने, ‘यसमा पनि राजनीति गरेर दशौँ राष्ट्रिय खेलकुद पछि सार्न खोजियो भने यो हजारौँ खेलाडी र खेलप्रेमीका लागि घात हुनेछ ।’
उनले निर्माणको अन्तिम चरणमा रहेको रंगशाला पश्चिम नेपालको खेलक्षेत्र र खेलाडीको वृत्ति विकासमा महत्वपूर्ण योगदान पुग्ने विश्वास गरे । ‘अहिलेसम्मका रंगशालामध्ये विभिन्न ठाउँमा देखिएका कमीकमजोरी सच्याएर आधुनिक प्रविधिको प्रयोग गरेर जुन रूपमा निर्माण करिब–करिब सम्पन्न हुने चरणमा गएको छ । यो हामी सबैका लागि खुसी र गौरवको कुरा हो,’ उनले भने ।
रंगशाला आधुनिक र अन्तर्राष्ट्रिय मापदण्डअनुसार बनेको पाइएको उल्लेख गर्दै अध्यक्ष प्रचण्डले यसको अत्यधिक सदुपयोग गर्नुपर्ने बताए । लुम्बिनी, कर्णाली र सदूरपश्चिमको खेलक्षेत्रका लागि यो केन्द्र बन्ने र देशभरिकै खेलाडीका लागि पनि राष्ट्रिय खेलकुद सुर्खेतमा आयोजना गर्न सकिने ढोका खुलेको टिप्पणी गरे । उनले आफू तीनपटक प्रधानमन्त्री हुँदा लगातार खेलक्षेत्रको विकासलाई प्राथमिकता दिँदै आएको बताए ।
अनुगमनका क्रममा कर्णाली प्रदेशका पूर्वमुख्यमन्त्री महेन्द्रबहादुर शाही, पूर्वखेलकुदमन्त्री विमला केसी, कर्णाली खेलकुद परिषद्का सदस्यसचिव विश्वामित्र सञ्ज्याललगायतका खेल पदाधिकारीको उपस्थिति रहेको थियो ।
२४ खेल मात्रै कर्णालीमा हुने
कर्णाली प्रदेश खेलकुद विकास परिषद्का सदस्यसचिव सञ्ज्यालले आवासका कारण कर्णाली प्रदेशको पाँच जिल्लामा ३६ मध्ये २२ देखि २४ खेल मात्र गर्न सकिने बताएका छन् । महिला फुटबल, उसु, पुरुष र महिला बास्केटबल, जुडो, पुरुष र महिला हक्कीसँगै तेक्वान्दोका इभेन्ट दशौँ राष्ट्रिय खेलकुदको उद्घाटन अघि नै हुनेछन् ।
सुटिङ र गल्फ कहाँ गर्ने अझै निर्णय भएको छैन । राखेपले प्रतियोगिता सञ्चालनका लागि निर्णायक संख्या एक हजार चार सय ९९ प्रस्ताव गरिसकेको छ ।
