इरानसँग लिग चरणमा ३–२ ले पराजित नेपाललाई मंगलबार दोस्रो सेमिफाइनलमा बदला लिने अवसर
नेपालले सेन्ट्रल एसियन भलिबल एसोसिएसन (काभा) नेसन्स लिगको सेमिफाइनलमा मंगलबार बलियो इरानको सामना गर्दै छ । राष्ट्रिय खेलकुद परिषद्को कभर्ड हलमा सोमबार माल्दिभ्समाथि ३–० को सीधा सेटमा हराउँदै नेपालले फाइनल प्रवेशको खेलमा मुस्लिम राष्ट्र इरानलाई प्रतिद्वन्द्वीका रूपमा पाएको हो । लिगमा नेपाल दोस्रो र इरान तेस्रो भएका छन् । काभाको नियमअनुसार दोस्रो तथा तेस्रो टोलीबीच सेमिफाइनलमा एक–आपसमा भिड्नुपर्नेछ । शीर्ष स्थानको भारतले पहिलो सेमिफाइनलमा श्रीलंकाको सामना गर्नेछ ।
लिग चरणअन्तर्गत आइतबार भएको खेलमा नेपाल इरानसँग ३–२ को सेटमा पराजित भएको थियो । नेपालले एक मात्र हार सामना गरेको इरानसँगै थियो । लगातार चार खेलमा हार निकालेको माल्दिभ्स प्रतियोगिताबाट बाहिरिसकेको छ ।
सहभागीमध्ये कमजोर प्रतिद्वन्द्वी माल्दिभ्समाथि नेपालले दोस्रो रोजाइका खेलाडी उतारेको थियो । भारत र इरानविरुद्ध २४ घन्टाको अन्तरमा प्रतिस्पर्धा गर्दा घरेलु नेपाली महिला खेलाडी थाकेका थिए । इरानविरुद्धको प्रतिस्पर्धामा पाँच सेटसम्म जाँदा खेलाडीले कमब्याक गर्न सकेनन् ।
एक खेल अगाडि नै अन्तिम चारमा पुगेको नेपालले दोस्रो रोजाइको खेलाडीको भरमै माल्दिभ्सलाई २५–८, २५–१९ र २५–१८ ले हरायो । सिनियर खेलाडीले आराम पाउँदा दोस्रो रोजाइले अन्तर्राष्ट्रिय खेलको अनुभव लिन अवसर पाएका छन् । एक दिन रेस्ट पाएका घरेलु खेलाडीले सेमिफाइनलमा इरानविरुद्ध लयमा प्रतिस्पर्धा गर्ने अपेक्षा छ
पाँच टोली सहभागी प्रतियोगितामा भारतले चार खेलबाट सर्वाधिक १० अंक जोड्दै शीर्ष स्थानमाथि कब्जा जमायो । नेपाल चार खेलमा एक हार र तीन जित निकाली नौ अंक जोड्यो । लिग चरणमा नेपाल दोस्रो भयो । तेस्रो स्थानमा रहेको इरानले सात अंक बटुल्यो । लिगमा चौथो स्थान रक्षा गरेको श्रीलंकाले चार अंक जोडेको छ । नेपालका प्रशिक्षक जगदिश भट्टले इरानविरुद्ध अघिल्लो खेलमा भएको गल्ती सुधार गर्दै खेल्ने बताएका छन् ।
‘भारतसँगको खेलका कारण इरानविरुद्धको खेलमा खेलाडी धेरै थाके । खेलाडीले लिग चरणमा धेरै गल्ती गरे,’ प्रशिक्षक भट्टले भने, ‘अब सेमिफाइनलमा ती गल्ती दोहोरिँदैन ।’ लिग चरणमा पौँचौ“ सेटमा पराजित भएको नेपालले सेमिफाइनलमा इरानलाई सोझो सेटमा हराउने उनको भनाइ छ । ‘हामी इरानलाई सोझो सेटमै पराजित गर्ने योजनाका साथ खेल्छौँ,’ उनले भने, ‘यसमा सबैले उत्कृष्ट खेल्नुपर्छ ।’ कप्तान अरुणा शाहीले पनि मंगलबार हुने खेलमा गल्ती नगर्ने बताइन् ।
बेन्चमा रहेका खेलाडीलाई अवसर
नेपालले लिग चरणको अन्तिम खेलमा माल्दिभ्सविरुद्ध सहज जित निकालेको छ । तुलनात्मक रूपमा कमजोर माल्दिभ्सविरुद्ध प्रशिक्षक भट्टले सुरुमा बलियो टोली उतारेका थिए । यसै खेलबाट बेन्चमा रहेका मिडब्लकर संगम महतो र लिबेरो शान्ति तामाङले अवसर पाएका छन् । बेन्चमा अधिकांश रहेका पुनम चन्द, कामना विष्ट, साफिया पुन, आरती सुवेदीले अवसर पाएका हुन् ।
माल्दिभ्सविरुद्ध फराकिलो अग्रता बनाएपछि प्रशिक्षक भट्टले सिनियर खेलाडी पहिलो सेटमै परिवर्तन गरे । उनले दोस्रो रोजाइका खेलाडीलाई पहिलो सेटबाटै अवसर दिँदा नेपाल २५–८ ले विजयी भयो । दोस्रो सेटमा पनि भट्टले नयाँ खेलाडीलाई अवसर दिए । उषा भण्डारीले मात्रै नियमित खेलाडीका रूपमा कोर्टमा थिइन् । दोस्रो सेटमा माल्दिभ्सले दबाब बढाएपछि ओपन हिटर निरुता ठगुन्ना र लिबेरो सलिना श्रेष्ठलाई कोर्टमा पठाइएको थियो । दोस्रो सेट १८–१८ को स्थितिमा रहँदा सिनियर खेलाडीले खेल नियन्त्रण गर्न कोर्टमा गएका हुन् ।
इरानलाई सोझो सेटमै हराउँछौँ : जगदिश भट्ट, प्रशिक्षक, नेपाल
भारत र इरानसँग पाँच सेट खेल्न परेको थियो । इरानसँग पाँचौँ सेट पनि राम्रो गरेका थियौँ । भारतसँग ब्लक राम्रो भयो । इरानसँग त्यही कमजोर भयो । अब, हामी तीन सेटमै जित्ने गरी खेल्छौँ । माल्दिभ्ससँग नयाँ खेलाडीलाई अवसर दिएका थियौँ । उनीहरूले सोचेजस्तो खेले । उनीहरूलाई आत्मविश्वास चाहिएको थियो । दोस्रो रोजाइका खेलाडीलाई त्यसैले अवसर थियौंँ ।
हाम्रो लक्ष्य स्वर्ण हो : अरुणा शाही, कप्तान, नेपाल
अहिलेसम्मको यो माल्दिभ्सविरुद्धको सहज जित हो । हाम्रा लागि सेमिफाइनल निकै महत्वपूर्ण हुनेछ । इरानविरुद्ध अघिल्लो खेलमा रिसिभ र डिफेन्समा राम्रो भएन । फाइनल प्रवेशको खेलमा त्यो गल्ती दोहोर्याउन हुँदैन । सामान्य गल्तीले पनि नेपालको उपाधि जित्ने सपना तुहिन सक्छ । यसकारण हामी सेमिफाइनलमा गल्ती नगरी खेल्छौँ । अन्तिम चारमा पुगेका चारै टोली बलिया छन् । हाम्रो लक्ष्य स्वर्ण पदक हो ।
