जापानका चर्चित खेलाडी होन्डालाई अनुबन्ध गरेको भुटानको पारो क्लबले एएफसी च्यालेन्ज कपको प्ले अफमा नेपालको लिग विजेता चर्च ब्वाइजविरुद्ध २९ साउनमा दशरथ रंगशालामा प्रतिस्पर्धा गर्दै छ
एएफसी च्यालेन्ज लिगको प्ले–अफ खेल्न जापानका चर्चित स्ट्राइकर केसुके होन्डा नेपाल आउने भएका छन् । एएफसी च्यालेन्ज लिगको प्रारम्भिक चरणमा सहिद स्मारक ‘ए’ डिभिजन लिग विजेता चर्च ब्वाइज युनाइटेड र भुटानको लिग च्याम्पियन पारो एफसीबीच दशरथ रंगशालामा २९ साउनमा खेल हुँदै छ । प्ले–अफ खेलक लागि भुटानको पारोले विश्वकप खेलिसकेका होन्डालाई अनुबन्ध गरेको हो । पारोले आफ्नो अफिसियल फेसबुक पेजमा होन्डालाई अनुबन्ध गरेको जनाएको छ ।
सन् २००८ देखि २०१८ सम्म होन्डाले जापानको राष्ट्रिय फुटबल टोलीमा आबद्ध थिए । उनले इटलीको चर्चित क्लब एसी मिलान, रसियन क्लब सिएसकेए मस्कोजस्ता क्लबबाट व्यावसायिक फुटबल खेलेका थिए । जापानबाट ९८ अन्तर्राष्ट्रिय खेलमा उनले ३७ गोल गरेका छन् । राष्ट्रिय टोलीबाट सन्न्यास लिएपछि उनले कम्बोडियाको राष्ट्रिय टोली र यू–२३ को प्रशिक्षकको जिम्मेवारी सम्हालेका थिए ।
भुटानी क्लबले जापानिज खेलाडीको आगमनले एसियन फुटबलको उच्चस्तरमा प्रतिस्पर्धा गर्नका लागि क्लबलाई सहयोग पुग्ने विश्वास लिएको छ । पारोले विलियम ओपोकु, जापानको कोकी नारितालाई पनि क्लबमा अनुबन्ध गरेको छ । पारोले एक दर्जन विदेशी खेलाडी अनुबन्ध गरेको छ । गत सिजन नेपाल सुपर लिगमा एफसी चितवनबाट खेलेका डिफेन्डर मार्को इभानोभिच र वीरगन्ज युनाइटेडबाट खेलेका मिडफिल्डर विलियम ओपोकु पनि पारोमा छन् । भुटानका राष्ट्रिय टोलीका खेलाडीसमेत रहेको टोलीको प्रशिक्षकमा पुष्पलाल शर्मा छन् ।
प्ले–अफ जित्ने टोलीले एक लाख अमेरिकी डलर प्राप्त गर्नेछ । एसियाली फुटबल महासंघ (एएफसी)ले बिहीबार एएफसी क्लब प्रतियोगिता संरचनाको परिमार्जित भागको रूपमा प्रतियोगिताको घोषणा गरेको थियो । प्रतियोगिताको समूह चरणमा १८ टोलीले प्रतिस्पर्धा गर्नेछन् ।
पिटर र करिम चर्च ब्वाइजमा
चर्च ब्वाइज युनाइटेडले दुई विदेशी खेलाडी अनुबन्ध गरेको छ । क्लबले सामाजिक सञ्जालमार्फत रक्षक ओमोलाजा नुरेन करिम र मिडफिल्डर पिटरलाई अनुबन्ध गरेको जानकारी दिएको हो । नाइजेरियाका करिमले मच्छिन्द्र क्लबबाट ‘ए’ डिभिजन लिग खेलेका थिए । उनीसँग बुटबल लुम्बिनी र ललितपुर सिटीबाट नेपाल सुपर लिग खेलेको अनुभव छ । च्यालेन्ज लिगको प्रारम्भिक चरणका लागि चर्च ब्वाइजले आफ्नो तयारी सुरु गरेको छ ।
चर्च ब्वाइजले दुई साताअघि देखि तयारी सुरु गरिसकेको हो । चर्च ब्वाइजले पारोविरुद्ध उत्कृष्ट नतिजा निकाल्न घरेलु फुटबलका नाम चलेका खेलाडीलाई अनुबन्ध गरी प्रशिक्षण सुरु भएको जनाएको छ । चर्च ब्वाइजको कप्तानी अनन्त तामाङले गर्नेछन् । राष्ट्रिय टोलीका लागि संयुक्त रूपमा सर्वाधिक १३ गोल गरेका अञ्जन विष्ट पनि यसै क्लबमा छन् ।
एरिक विष्ट, आयुष घलान, लकेन लिम्बू, सनिश श्रेष्ठ, दीप कार्कीलगायत खेलाडी पनि चर्च ब्वाइजमा अनुबन्धित भएका छन् । चर्च ब्वाइजले प्रशिक्षकमा बालगोपाल महर्जनलाई नियुक्त गरेको छ । यसअघि महर्जनकै प्रशिक्षणमा चर्च ब्वाइजले ए डिभिजन लिगको उपाधि जितेको थियो । गत सिजन पहिलो चरणको छनोटमा नेपालको मच्छिन्द्र क्लबले पारो एफसीलाई नै दशरथ रंगशालामा हराएको थियो । मच्छिन्द्र प्ले–अफको दोस्रो खेलमा भारतीय टोली मोहुन बगानसँग पराजित भएको थियो ।
