नेपाल प्रहरी अस्पतालले बजेटको सुनिश्चितता नै नगरी खरिद प्रक्रिया अघि बढाएको खुलेपछि प्रहरी प्रधान कार्यालयले छानबिन थालेको छ । अस्पतालले डिजिटल एक्सरे मेसिन खरिद प्रक्रिया अघि बढाएकोमा आपूर्तिकर्ताले सामान बुझाइसकेपछि समयसीमाभित्र सामान दिन नसकेको बहाना गरेर गत २३ असारमा ठेक्का रद्द गरेपछि कार्यालयले छानबिन थालेको हो ।
बजेट नै सुनिश्चित नगरी ठेक्का प्रक्रिया अघि बढाएको र दुई थान एक्सरे मेसिन जडान भइसकेपछि सम्झौता रद्द गरेको खुलेको छ । प्रहरी केन्द्रीय अस्पतालले तीन डिजिटल एक्सरे मेसिन खरिदका लागि मेडिइक्युप्स नेपाल प्रालिसँग गत १९ माघमा तीन करोड १३ लाख रुपैयाँमा सम्झौता गरेको थियो । सम्झौताअनुसार गत १२ वैशाखमा सुनसरीको इनरुवा तथा २३ वैशाखमा धनगढीस्थित प्रहरी अस्पतालमा एक्सरे मेसिन जडान भइसकेको छ । महाराजगन्जस्थित केन्द्रीय अस्पतालमा पनि मेसिन आपूर्ति भइसकेको, तर एक्सरे ट्युब बुझाउने क्रममा अस्पतालले नबुझी ठेक्का नै रद्द गरेको हो ।
यसमा अस्पताल प्रमुख एआइजी डा. आशा सिंहको गम्भीर त्रुटि देखिएको छ । प्रहरी कल्याण कोषमार्फत प्रहरी अस्पतालले एक्सरे मेसिन खरिद प्रक्रिया अघि बढाएको थियो । तर, खरिदका लागि छुट्याइएको बजेट कोषको मूलधनका रूपमा राखिएको थियो । मूलधनमा राखिएको पैसा खर्च गर्न नमिल्ने कल्याण कोषको नियमावलीमा छ । एआइजी सिंहले भने मूलधनबाटै भुक्तानी दिने योजनासाथ ठेक्का प्रक्रिया अघि बढाएकी थिइन् । तर, पछि भुक्तानी दिन नसक्ने भएपछि आपूर्तिकर्तामाथि अन्याय गरेकी छिन् । यसमा एआइजी सिंहमाथि कारबाही हुने देखिएपछि उनले सामान आपूर्ति भइसकेपछि सम्झौता रद्द गरेको अस्पताल स्रोत बताउँछ । दुई अस्पतालमा एक्सरे जडान भएर सञ्चालनसमेत भइरहेको अवस्थामा समयभित्र सामान आपूर्ति गर्न नसकेको भनेर सम्झौता रद्द गरिएको छ । भुक्तानी दिन समस्या हुने थाहा पाएपछि अस्पतालले ठेकेदारलाई झुटा आरोप लगाएर सम्झौता रद्द गरेको स्रोत बताउँछ ।
उक्त ठेक्काको विषयमा उजुरी परेको र छानबिन अघि बढाइएको केन्द्रीय प्रहरी प्रवक्ता डिआइजी दानबहादुर कार्कीले बताए । ‘ठेक्कामा केही कैफियत देखिएपछि छानबिन गर्न लागेका हौँ,’ उनले भने ।
प्रहरीबाटै आफूमाथि अन्याय भएको भन्दै मेडिइक्युप्स नेपाल प्रालिका सञ्चालक केशव पाण्डे न्याय माग्दै प्रहरी प्रधान कार्यालय पुगेका छन् । दुई अस्पतालमा जडान भइसकेको र केन्द्रीय अस्पतालमा सामान बुझिदिन पटक–पटक आग्रह गर्दा पनि अस्पतालले नमानेको र अन्तिममा गैरकानुनी रूपमा सम्झौता रद्द गरेको भन्दै उनले प्रहरी महानिरीक्षक वसन्तबहादुर कुँवरसमक्ष उजुरी गरेका छन् । आफ्नो सामान कैफियत भए जिम्मेवारी लिने भन्दै उनले छानबिनका लागि आग्रह गरेका छन् । प्रारम्भिक छानबिनमा प्रहरी अस्पतालको कमजोरी देखिएपछि प्रहरी प्रधान कार्यालयको प्रशासन विभागले छानबिन समिति बनाएर यस विवादमा अध्ययन गर्न लागेको हो ।
