राजीनामा दिएर मार्गप्रशस्त गर्न मुख्यमन्त्री जम्कट्टेललाई कांग्रेसको आग्रह

कांग्रेस बागमती प्रदेश संसदीय दलका नेता बहादुरसिंह लामाले बागमती प्रदेशका मुख्यमन्त्री शालिकराम जम्कट्टेललाई राजीनामा दिएर नयाँ सरकार गठनका लागि मार्गप्रशस्त गर्न आग्रह गरेका छन् ।

नेता लामाले बिहीबार एक विज्ञप्ति जारी गर्दै कांग्रेस र एमालेबीच बनेको नयाँ सत्तासमीकरणका कारण वर्तमान प्रदेश सरकार अल्पमतमा परिसकेकाले नयाँ सरकार गठनका लागि मुख्यमन्त्रीलाई राजीनामा दिएर मार्गप्रशस्त गर्न आग्रह गरेका हुन् ।

उनले वर्तमान सरकारबाट मुख्यमन्त्री जम्कट्टेललाई समर्थन दिएको साझेदार दल एमालेले समर्थन फिर्ता लिएर मन्त्रीहरूले समेत राजीनामा दिएर सरकारबाट बाहिरिइसकेको सन्दर्भमा सरकार कामचलाउ हैसियतमा पुगेको भन्दै मुख्यमन्त्री जम्कट्टेललाई दूरगामी असर पुर्याउने कुनै निर्णय नगर्न पनि आग्रह गरेका छन् । 

विज्ञप्तिमार्फत नेता लामाले यस्तो अवस्थामा सरकारले कुनै महत्त्वपूर्ण निर्णय, नियुक्ति र त्यस प्रकृतिको अन्य कार्यहरू गर्नु नैतिकताको हिसाबले पनि उपयुक्त नहुने भएकाले त्यसतर्फ ध्यान पुर्याउन पनि सचेत गराएका छन् ।

नेता लामाद्वारा जारी विज्ञप्तिमा मुलुकको बदलिँदो राजनीतिक परिवेशमा राजनीतिक स्थायित्व र संविधानमा समयानुकूल संशोधन गर्न संघ र सातवटै प्रदेशहरूमा सहमतिको सरकार गठन गर्ने संकल्पका साथ पहिलो र दोस्राे पार्टी नेपाली कांग्रेस र नेकपा एमालेबीच नयाँ समीकरण निर्माण भएको सन्दर्भमा प्रदेशका मुख्यमन्त्री जम्कट्टेलले सहज राजीनामा दिएर मार्गप्रशस्त गर्नु उपुक्त हुने कुरा उल्लेख गरिएको छ ।