बाल यौन दुरुपयोग मुद्दा : बम्जनलाई १० वर्ष कैद फैसला

बम्जनविरुद्ध अनुयायीको हत्या, बेपत्ता तथा यौनहिंसाको पनि उजुरी

मंगलबार, १८ असार, २०८१
डिजिटल संस्करण

जिल्ला अदालत सर्लाहीले तपस्वी भनिने रामबहादुर बम्जनलाई बाल यौन दुरुपयोग मुद्दामा १० वर्ष कैदको फैसला सुनाएको छ । न्यायाधीश जीवनकुमार भण्डारीको इजलासले सोमबार उनलाई कैद सजायसँगै पीडितलाई पाँच लाख क्षतिपूर्ति भराउने फैसला गरेको हो । बम्जन गत वर्ष २६ पुसदेखि नै पुर्पक्षका लागि जिल्ला कारागार महोत्तरीमा छन् ।

अदालतले १० असारमा बम्जनलाई दोषी ठहर गरेको थियो । सोमबार कैद सजाय निर्धारण भएको अदालतका स्रेस्तेदार सदन अधिकारीले बताए । आफू १४ वर्षकी छँदा बम्जनले यौन शोषण (यौन दुरुपयोग) गरेको भन्दै रौतहटकी एक पीडितले २३ माघ ०७६ मा दर्ता गराएको जाहेरीका आधारमा मुद्दा अगाडि बढेको थियो । सर्लाहीको लालबन्दी नगरपालिका–१२ पत्थरकोटस्थित आश्रममा आनी बसेको समयमा बम्जनले यौनशोषण गरेको बालिकाले दिएको बयानमा उल्लेख छ । 

बम्जन बाराको निजगढ नगरपालिका– १२ का बासिन्दा हुन् । २३ माघ ०७६ मा जिल्ला प्रहरी कार्यालय सर्लाहीमा किटानी जाहेरी दर्ता भएको थियो । मुद्दा दर्तापछि अदालतले बम्जनविरुद्ध २१ असार ०७७ मा पक्राउ पुर्जी जारी गरेको थियो । उनी गत वर्ष २४ पुसमा काठमाडौंको बुढानीलकण्ठ नगरपालिका– ६ स्थित निवासबाट पक्राउ परेका थिए । 

‘लिटिल बुद्ध’को उपनामसमेत पाएका बम्जनमाथि आश्रममा बस्ने अन्य अनुयायीको हत्या गरेको, बेपत्ता पारेको तथा यौनहिंसा गरेको उजुरी पनि छ । पीडित पाँच परिवारले उनीविरुद्ध उजुरी दिएका छन् । आश्रममा बस्दै आएका तीन युवती र दुई युवालाई बेपत्ता पारेको आरोपमा विभिन्न प्रहरी कार्यालयले बम्जनविरुद्ध उजुरी दर्ता गरेका छन् । 
 

See More On

सुझावित समाचार