सुदूरपश्चिम प्रदेश सभामा प्रमुख प्रतिपक्षी कांग्रेसले प्रदेश सरकारले बजेटको ‘रातो किताब’ आधिकारिक रूपमा सार्वजनिक नगर्दै कम्प्युटरमा टाइप गरेको प्रति ‘लिक’ गरिएको भन्दै आपत्ति जनाएको छ । कांग्रेस संसदीय दलले मंगलबार पत्रकार सम्मेलन गरेर रातो किताब नआउँदै र आर्थिक मामिला मन्त्रालयले आफ्नो वेबसाइटमा नराख्दै टाइप गरेको ‘पीडिएफ फाइल’ लिक हुनु गम्भीर विषय भएको जनाएको छ ।
कांग्रेस संसदीय दलका नेता एवं पूर्वमुख्यमन्त्री कमलबहादुर शाहले यसबारे उच्चस्तरीय छानबिन समिति गठन गर्न माग गरेका छन् । ‘बजेट आएको करिब दुई सातासम्म सांसदलाई न रातो किताब दिइएको छ, न वेबसाइटमा राखिएको छ । आर्थिक मामिला मन्त्रालयमा बुझ्दा अहिलेसम्म बजेट पुस्तिका सार्वजनिक गरेका छैनौँ भन्छ,’ उनले भने, ‘तर, पिडिएफ फाइल मान्छेहरूका मोबाइलमा पुगेको छ । यो कसरी भयो, यसको नैतिक जिम्मेवारी सरकारले लिनुपर्छ ।’
सरकारको गैरजिम्मेवारपन र स्वार्थका कारण लिक भएको उनले आरोप लगाए । सरकारमा रहेकाहरूले बिचौलियाबाट रकम उठाउन सजिलो होस् भनेर पिडिएफ फाइल बिचौलियाकहाँ पुर्याएको हुन सक्ने शाहको भनाइ छ । कांग्रेसले पत्रकार सम्मेलनमा देखाएको पिडिएफ फाइलमा मन्त्रालयगत बजेटका विवरण उल्लेख गरिएका छन् । विगतमा यस्ता विषयमा संघमा मन्त्रीले राजीनामा दिएको उदाहरण रहेको भन्दै नेता शाहले सरकारले नैतिकताका आधारमा राजीनामा दिनुपर्ने माग गरे ।
‘रातो किताब नआउँदै, मन्त्रालयले सार्वजनिक नगर्दै कसरी बाहिर आयो ? रकम उठाउन सजिलो होस् भनेर बिचौलियालाई पुर्याइएको हुन सक्ने हामीलाई लागेको छ,’ उनले भने, ‘यो सामान्य विषय होइन्, यसबारे सरकारले तत्काल आफ्नो धारणा सार्वजनिक गरोस् । हामी उच्चस्तरीय छानबिन समिति गठन गर्न माग गर्दछौँ ।’ सरकारले नैतिक जिम्मेवारी लिँदै छानबिन गरेर यसमा दोषी देखिएकाहरू कारबाहीको दायरामा ल्याउनुपर्ने मागसमेत उनले गरे ।
